उपसभामुख तामाङद्धारा नुवाकोटका बिकासे योजनाको अनुगमन
नुवाकोट,जेठ २५ । नुवाकोटका नेतृ तथा बागमती प्रदेशका उपसभामुख राधिका तामाङले जिल्लाको विकास निर्माणका गतिविधिको अनुगमन गरेका छन । उपसभामुख तामाङले शनिबार आफ्नो निर्वाचन क्षेत्र समेत रहेको दुप्चेश्वर तथा तादी गाउँपालिकाको विविध योजना तथा बिकासनिर्माणका गतिविधि अनुगमन गरेका हुन ।
प्रदेश सरकारबाट बिनियोजित रकम स्थानीय स्तरमा सहि सदुपयोग भए नभएको अनुगमन गर्दै उपसभामुख तामाङले लकडाउन अवधिमा समेत बिकास निर्माणका गतिविधिलाई अगाडि बढाउन सकिने बताउनुभयो।उपसभामुख तामाङले बिकास निर्माणको काममा स्थानीय सरकार र कार्यान्वयन इकाइलाइ जिम्मेवार भै गुणस्तरीय र मापदण्ड अनुरुप काम गर्न समेत निर्देशन दिएका छन ।
अनुगमनका क्रममा दुप्चेश्वर गाउँपालिकाका प्रमुख योबिन्द्र सिह तामाङ, वडा नम्बर ६ का अध्यक्ष किशोर आचार्य, इलाका प्रहरी कार्यालय खरानीटारका प्रमुख कमला नराल , वडा सदस्य राजकुमार श्रेष्ठ , नेकपा दुप्चेश्वरका सचिव शंकर थापा लगायतको सहभागिता रहेको थियो ।
उपसभामुखको अगुवाइमा भएको अनुगमनमा दुप्चेश्वर माध्यामिक विद्यालयको वाल कम्पाउण्ड,दुप्चेश्वर मन्दिर परिसर निर्माण अनुगमन,रामति -सिम्टाङ – कालाभन्ज्याङ सडक अनुगमन , समुन्द्रटार स्वास्थ्य चौकी भवन योजना,सातबिसे-देउराली -बागमारा सडक लगायतको अनुगमन सम्पन्न भएको बागमती प्रदेश उपसभामुख सचिवालयले जनाएको छ।
तत्काल जिल्लाका अन्य क्षेत्रमा समेत बिकास निर्माणका गतिविधि अनुगमनलाई निरन्तरता दिइने श्रोतले जनाएको छ।
