राष्ट्रपति नेपाली कांग्रेसलाई दिन माओवादीसहितका दलहरु सहमत
काठमाडौं,फागुन १३। नेपाली काँग्रेसका तर्फबाट राष्ट्रपति बन्ने सहमति भएको छ ।
बालुवाटारमा बसेको आठ ओटा दलको बैठकमा नेपाली कांग्रेसलाई राष्ट्रपति दिने सहमति जुटेको स्रोतले बताएको छ । यसैवीच नेपाली काँग्रेसका नेता पुर्ण बहादुर खड्काले पनि साँझ ६ बजे साँझ प्रधानमन्त्री निवास बालुवाटारमा बसेको दलहरुको बैठकले राष्ट्रपतिको निर्वाचनमा नेपाली काँग्रेस पार्टीको उम्मेदवारलाई समर्थन गर्ने सर्बसम्मतिले निर्णय गरेकाे बताएका छन् ।
स्रोतका अनुसार नेपाली कांग्रेस, नेकपा(माओवादी केन्द्र), जनता समाजवादी पार्टी(जसपा) र एकीकृत समाजवादीका नेताहरु सहित विभिन्न दलका प्रतिनिधिहरुको बैठकमा राष्ट्रपतिबारे सहमति जुटेको बताइएको छ । जसअनुसार राष्ट्रपतिमा आठ ओटा दलको तर्फबाट संयुक्त रुपमा नेपाली कांग्रेसका उमेद्वारले उम्मेदवारी दिने छन् ।
नेपाली काँग्रेसको तर्फबाट भावी राष्ट्रपतिमा रामचन्द्र पौडेल र कृष्ण सिटौलाको नाम चर्चामा रहेको छ । विभिन्न दलहरुले राष्ट्रपतिमा सहमति दिएपछि प्रतिनिधिसभामा ठूलो दल भएर पनि प्रतिपक्षमा रहेको नेपाली कांग्रेस फेरि शक्तिमा फर्किएको छ ।
निर्वाचन आयोगले फागुन २५ गते राष्ट्रपतिको निर्वाचन गर्ने निर्णय गरेको छ । राष्ट्रपति विद्यादेवी भण्डारीको कार्यकाल आगामी फागुन २८ गते सकिँदैछ। संविधानअनुसार नेपालको राष्ट्रप्रमुखका रूपमा राष्ट्रपति रहन्छन्।