आर्यघाटमा निःशुल्क शवदाहको व्यवस्था गर्दै पशुपति विकास कोष
काठमाडौं,जेठ १ । पशुपति क्षेत्र विकास कोषले पशुपति आर्यघाटस्थित विद्युतीय शवदाह गृहमा दाहसंस्कारका लागि ल्याइने शवलाई निःशुल्क शवदाहको व्यवस्था गर्ने भएको छ ।
संस्कृति, पर्यटन तथा नागरिक उड्डयन मन्त्रालयमा बसेको कोष सञ्चालक परिषद्को बैठकले थप चार विद्युतीय शवदाह गृहको व्यवस्था गरी निःशुल्क दाहसंस्कारको व्यवस्था गर्ने निणर्य गरेको कोषका सदस्य सचिव डा. मिलनकुमार थापाले जानकारी दिए ।
‘कोषले कार्यविधि निर्माण गरेपछि कोष सञ्चालक परिषदले उक्त कार्यविधि पारित गर्नेछ,’ उनले भने, ‘यसका लागि केही समय लाग्नेछ ।’ पशुपतिमा रहेका दुइटा विद्युतीय शवदाह गृहमध्ये एउटाको यन्त्र बिग्रिएको छ ।
हाल एउटा शवदाह गृह मात्र सञ्चालनमा रहेको सदस्य सचिव थापाले बताए । सोही स्थानमा थप चार विद्युतीय शवदाह गृह निर्माण गरी घाटमा आउने सबै शवलाई निःशुल्क दाहसंस्कारको व्यवस्था गर्ने तयारी गरिएको कोषले जनाएको छ । पशुपति आर्यघाटमा शवको दाहसंस्कार गरेबापत दाउराबाट जलाउने घाटमा रू. १५ हजार र विद्युतीय शवदाह गृहमा रू. ४ हजार शुल्क तोकिएको छ ।
इच्छुक दाताका लागि स्वेच्छाले कोषको खातामा आर्थिक सहयोग गर्न चाहेमा विकल्प खुला राखिने कोषले जनाएको छ । थप विद्युतीय शवदाह गृह यन्त्र खरीदका लागि कोषले आफ्नै स्रोतबाट रू. ८ करोड छुट्याएको छ ।
शवदाह गृह निर्माणपछि निःशुल्क सञ्चालनका लागि कोषले रू. १ करोडको अक्षय कोष स्थापना गरेको कोषका प्रवक्ता रेवतीरमण अधिकारीले जानकारी दिए । बैठकको अध्यक्षता संस्कृति, पर्यटन तथा नागरिक उडडयनमन्त्री सुदन किराँतीले गरेका थिए । बैठकमा संस्कृति, पर्यटन तथा नागरिक उड्ययन राज्यमन्त्री सुशीला सिर्पालीकोसमेत उपस्थिति थियो ।