नुवाकोटमा एकैदिन दुई वटा मोटरेबल पुल उद्घाटन
नुवाकोट,फागुन १६ । नुवाकोटमा एकैदिन दुई मोटरेबल पुल उद्घाटन गरिएको छ । भौतिक तथा यातायात मन्त्री देवेन्द्र दाहालले विदुर नगरपालिकामा निर्माण भएको दुई पक्की मोटरेबल पुलको उद्घाटन गरेका हुन ।
शुक्रबार आयोजित छुट्टाछुट्टै कार्यक्रमकाबीच मन्त्री दाहालले नगरपालिकाको वडा नम्बर ४ र १२ जोड्ने सिमचौरस्थित पुलको उद्घाटन गरेका हुन् । यसैगरी मन्त्री दाहालले ढुंगे र त्रिशुलि बजार जोड्ने अर्को नयाँ पुलको उद्घाटन गरेका हुन् ।
त्रिशूली नदीमा निर्माण गरिएका दुवै पक्की पुलको उद्घाटनपछि त्रिशूलीमा आयोजित कार्यक्रममा मन्त्री दाहालले योजना माग गर्ने चरणमा पनि प्राथमिकताका आधारमा गर्नुपर्ने बताए ।
सिमचौरमा निर्माण भएको एक सय मिटर लम्बाई भएको पुलको लागत १० करोड ९६ लाख रुपैंयाँ रहेको भौतिक पूर्वाधार तथा यातायात मन्त्रालयका सचिव केशवकुमार शर्माले जानकारी दिए । यसैगरी ६० मिटर लम्बाई भएको त्रिशूलीको पुलको लागत ७ करोड ९९ लाख रुपैँया रहेको उनले जानकारी दिए ।