एनएसपीएल टी-१० क्रिकेट प्रतियोगिता हुँदै
काठमाडौं,असार २३ । ‘डिजीआर स्पोट्र्स एन्ड इभेन्ट म्यानेजमेन्ट प्रालि’को आयोजनामा टी–१० क्रिकेट प्रतियोगिता ‘नेपाल स्ट्रिट प्रिमियर लिग (एनएसपीएल)’ हुने भएको छ ।
आगामी असोज १५ देखि २४ गतेसम्म आयोजना हुने उक्त प्रतियोगितामा विभिन्न सात टोलीको सहभागिता रहने आयोजित पत्रकार सम्मेलनमा जानकारी दिइयो । आयोजक संस्थाका अध्यक्ष जानु सिंहले सिङ्गल राउन्ड रोविन लिगको आधारमा हुने उक्त प्रतियोगितामा कूल २४ खेल हुनेछन् । प्रतियोगिताका खेल भने काठमाडौँको मूलपानीस्थित तल्लो मूलपानी क्रिकेट मैदानमा हुनेछन् ।
उक्त प्रतियोगिताको ‘ब्रान्ड एम्बासडर’को रूपमा अभिनेता निखिल उप्रेती छन् । ‘स्ट्रिटदेखि स्टेडियमसम्म’ भन्ने मूल नाराका साथ आयोजना हुने उक्त एनएसपीएलको विजेता टोलीले २१ लाख तथा उपविजेताले ११ लाख प्राप्त गर्नेछन् ।
प्रतियोगिताको उद्देश्य देशभरका उदीयमान क्रिकेट खेलाडीहरूलाई राष्ट्रियस्तरमा प्रतिभा देखाउन ‘प्लेटफर्म’ दिने रहेको आयोजकले जनाएको छ ।