प्रधानमन्त्री निवास बालुवाटारमा सत्ता साझेदार शीर्ष नेताहरूबीच छलफल
काठमाडौँ, असार २४ । प्रधानमन्त्री केपी शर्मा ओलीसहित सत्ता साझेदार प्रमुख दुई दलका शीर्ष नेताहरूबीच आज प्रधानमन्त्री निवास बालुवाटारमा छलफल भएको छ।
बैठकमा नेपाली काँग्रेसका सभापति शेरबहादुर देउवा, उपसभापति पूर्णबहादुर खड्का, गृहमन्त्री रमेश लेखक, नेकपा एमालेका महासचिव शंकर पोखरेल र उपमहासचिव विष्णुप्रसाद रिमाल सहभागी थिए।
बैठकमा हालको राजनीतिक अवस्था, सरकार सञ्चालन, आगामी नीति तथा कार्यक्रम र बजेट कार्यान्वयन लगायतका समसामयिक विषयमा छलफल भएको स्रोतले जनाएको छ। साथै, सत्ता साझेदार दलहरूबीच सहकार्य मजबुत बनाउने विषयमा पनि गम्भीर कुराकानी भएको जनाइएको छ।
बैठकबारे आधिकारिक धारणा सार्वजनिक गरिएको छैन। तर, दलहरूबीच नियमित संवाद र समन्वय आवश्यक रहेको भन्दै यस्तो छलफललाई निरन्तरता दिने सहमति भएको बताइएको छ।