गोसाइँकुण्ड तालमा बेपत्ता दुई युवकको शव निकालियो
रसुवा, साउन १२ । धार्मिक तीर्थस्थल गोसाइँकुण्डमा स्नान गर्ने क्रममा डुबेर बेपत्ता भएका दुई युवकको शव नेपाल आर्मीको उद्धार टोलीले आज तालबाट निकालिएको छ।
मृत्यु हुनेमा मोरङको बेलबारी नगरपालिका–४ निवासी अन्दाजी २५ वर्षीय मनोज न्यौपाने र विराटनगर निवासी अन्दाजी २९ वर्षीय सुजन ढकाल रहेका छन्। तीर्थ स्नानका क्रममा उनीहरू आइतबार तालमा डुबेर बेपत्ता भएका थिए।
घटनापछि नेपाल आर्मी श्रीनाथ गणबाट खटिएको उद्धार टोलीले खोजी कार्य थालेको थियो। आज बिहान दुबै जनाको शव गोसाइँकुण्ड तालबाट बाहिर निकालिएको हो।
प्रत्येक वर्ष जनैपूर्णिमाका अवसरमा हजारौं भक्तजन गोसाइँकुण्डमा स्नान गर्न पुग्ने गर्दछन्। प्रशासनले तीर्थयात्रीलाई सुरक्षित तरिकाले स्नान गर्न तथा गहिरो स्थानमा नजान अनुरोध गरेको छ।