नुवाकोटमा ८५ प्रतिशत खेतमा धान रोपाई गरियो

• देवचन्द्र भट्ट

नुवाकोट,साउन १२ । समयमै मनसुन भएका कारण यस वर्ष नुवाकोटमा धान रोपाई कार्य जारी रहेको छ । १२ स्थानीय तह रहेको नुवाकोटमा साउनको तेस्रो सातासम्म धान रोपाई हुने गरेको छ । गत वर्ष भन्दा धेरै क्षेत्रफलमा बर्खे धान रोपिएको छ । आकाशे पानीको भर पर्नु पर्ने स्थानमा भने धान रोप्न बाँकी रहेको छ ।

पहाडी संरचना रहेको नुवाकोटमा साउनको दोेश्रो साता अर्थात् आइतबारसम्म कुल ८५ प्रतिशत खेतमा धान रोपाई गरिएको कृषि विकास कार्यालय नुवाकोटले जनाएको छ । कार्यालय प्रमुख केशव खनालका अनुसार नुवाकोटमा कुल १४ हजार २ सय ८३ हेक्टर जमिनमा बर्खे धानको खेती हुने गरेकोमा ८५ प्रतिशत खेतमा धान रोपिएको छ ।

नुवाकोटमा धान खेतीका लागि वर्षा भइरहेकाले टारी खेतमा मात्र धान खेती गर्न बाँकी रहेको खनालको भनाई छ । गत वर्ष ९६ प्रतिशत खेतमा धान रोपिएको थियो ।

हालमा १० हजार ६ सय १२ हेक्टर क्षेत्रफलमा धान रोपाई सम्पन्न भएको जनाइएको छ । सिँचाइ तथा पानीको उपलब्धता भएका खेतहरूमा धान रोपिइसकिएको कार्यालयले जनाएको छ ।

कार्यालयका अनुसार नुवाकोटमा करिब रोपाई अन्तिम चरणमा पुगेको र आकासे पानीको भर हुने केही टारी खेतहरूमा रोपाई गर्न बाँकी रहेको छ । यस वर्ष समयमै मनसुन भएको र यसको अवधि लामो रहेका कारण धान खेती गर्ने किसानहरूलाई समस्या नपरेको कृषि विकास कार्यालयका प्रमुख केशव खनालको भनाई छ ।

धानको लागि आवश्यक पानी बर्सात मार्फत पर्याप्त भएको र उपकरणको पनि अभाव नभएको कारण यस वर्षको वर्षे धानको उत्पादनमा वृद्धि हुने अपेक्षा गरिएको छ । सर्वसाधारण गाउँघरमै रहेका कारण खेतीपातीमा गत वर्षको भन्दा यस वर्ष बढोत्तरी भएको छ ।
हाल खेतमा रोपिएका धान मौलाउने समय भएकोले विभिन्न किसिमका रोग किराले समस्या हुने गरेकोले कृषकहरूलाई सचेत हुन कार्यालयले आग्रह गरेको  छ ।  विशेष गरी नुवाकोटको म्यागङ गाउँपालिका र किस्पाङ गाउँपालिकाको माथिल्लो भेगहरूमा स्थानीय जातको धान खेती गरिने भए पनि अन्य स्थानमा बढी मात्रामा हाइब्रिड तथा उन्नत जातको धान खेती गर्ने गरिएको छ ।

किसानहरूले परम्परागतको तुलनामा हाइब्रिड जातको धान धेरै रोप्ने गरेका छन् । ६० प्रतिशत हाइब्रिडको धान रोपिएको कार्यालयले जनाएको छ ।

किसानहरूले खुमलका विभिन्न सिरिजका साथै सावित्री, राम धान जातका धानसमेत रोपेका छन् । धान बालीको लागि आवश्यक पानी यस वर्ष समयमै बर्सात भएकाले जिल्लाको अधिकांश जमिनमा धान रोपाई सकिएको कृषि विकास कार्यालयका सूचना अधिकारी तथा वाली संरक्षण अधिकृत प्रवेश आचार्यले जानकारी दिए ।

अधिकृत आचार्यका अनुसार समयमै वर्षा भएकाले यस वर्ष धान उत्पादनसमेत वृद्धि हुने अपेक्षा कार्यालयले गरेको छ । धान मौलाउने समय भएकोले विभिन्न किसिमका रोग किराले समस्या हुने गरेकोले कृषकहरूलाई सचेत हुनसमेत कृषि विकास कार्यालयले किसानहरूमा आग्रह गरेको छ ।

नुवाकोटमा गत वर्षको तुलनामा यस वर्ष धेरै  क्षेत्रफलमा धान रोपाई सकिएको कार्यालयले जनाएको छ । किसानहरूले नुवाकोटमा भात खानका लागि हाइब्रिड तथा चिउराका लागि ताइचिन जातको धान खेती गर्ने गरेका छन् ।