भेलले कार बगायो
गुल्मी,साउन २० । गुल्मी जिल्लाको सत्यवती गाउँपालिका–६ उर्लीखोलामा डहरे खोलामा आएको पानीको भेलले एक कार बगाएको छ । शान्तिपुरबाट बुटवलतर्फ जाँदै गरेको बा ००१७ नम्बरको कार मङ्गलवार बिहान करिब ११:४५ बजे खोलामा आएको भेलले बगाएको हो ।
चालक गुल्मी चन्द्रकोट गाउँपालिका–४ का ४५ वर्षीय घनश्याम गौतमले चलाइरहेको कार अन्दाजी ५० मिटर तलसम्म बगेको थियो। घटनाको जानकारी पाउनासाथ इलाका प्रहरी कार्यालय जोहाङबाट प्रहरी हवलदार (प्र.ह.) सुरेश थारुको कमान्डमा ३ जना प्रहरीको टोली घटनास्थलमा खटिएको थियो ।
स्थानीयवासी तथा ट्याक्टरको सहयोगमा उक्त कारलाई खोलाबाट बाहिर निकालिएको प्रहरीले जनाएको छ। कारमा केही क्षति भए पनि मानवीय क्षति भने नभएको प्रहरीले जनाएको छ ।डहरे खोलामा पक्की पुल अभावमा वषौंदेखि सास्ती खेप्दै आएका छन् ।