बिमा बिना नै सवारी नवीकरण, पाँच सय घुसमा काम!
काठमाडौं, साउन २३ — तेस्रो पक्ष बिमा नगरी सवारीसाधन नवीकरण गर्ने क्रम बढ्दो छ। यातायात व्यवस्था सेवा कार्यालय सल्लाघारी र एकान्तकुनामा बिचौलिया र कर्मचारीको मिलेमतोमा पाँच सय रुपियाँ घुस लिएर बिमा बिना नै नवीकरण हुने गरेको छ।
एक मोटरसाइकल धनी विकास पौडेलले बिमा नगरी पाँच सय तिरेर सिधै नवीकरण गराएको अनुभव साझा गरेका छन्। त्यस्तै, बिमा कम्पनीका केही कर्मचारीले नक्कली कागज बनाइदिने गरेको समेत खुलेको छ।
यातायात ऐनअनुसार तेस्रो पक्ष बिमा अनिवार्य भए पनि कार्यान्वयन कमजोर छ। दुर्घटनामा तेस्रो पक्षको क्षति पुगेमा बिमा नभए सवारीधनीले लाखौँ क्षतिपूर्ति दिनुपर्ने हुन्छ। यातायात व्यवसायी महासंघले यसप्रति चिन्ता व्यक्त गर्दै प्रशासनलाई कडाइ गर्न आग्रह गरेको छ।
सल्लाघारी कार्यालय प्रमुख बद्रीप्रसाद निरौलाले बिमा बिना नवीकरण गर्न नमिल्ने बताउँदै त्यस्ता घटना फेला परे कारबाही हुने बताएका छन्। समाधानका लागि ब्लुबुकमा क्युआर कोड राखी अनलाइन प्रणाली लागू गर्ने तयारी भए पनि पूर्ण रूपमा कार्यान्वयन भइसकेको छैन।