सूचना प्रविधिको उपयोग गरेर सुशासन, विकास र समृद्धिलाई तीव्रता प्रधानमन्त्रीको आग्रह
काठमाडौं,भदौ २ । प्रधानमन्त्री केपी शर्मा ओलीले सूचना प्रविधिको उपयोग गरेर सुशासन, विकास र समृद्धिको तीव्रता दिनुपर्नेमा जोड दिएका छन् ।
राष्ट्रिय युवा सङ्घ नेपालद्वारा आयोजित अन्तर्राष्ट्रिय सूचना प्रविधि युवा सम्मेलन, २०२५ लाई भर्चुअलरुपमा आइतबार सम्बोधन गर्दै नेकपा (एमाले) का अध्यक्षसमेत रहेका प्रधानमन्त्री ओलीले समृद्ध नेपाल, सुखी नेपालीको राष्ट्रिय आकाङ्क्षा पूरा गर्न सूचना प्रविधिको उपयोग अनिवार्य भएको बताए । उनले आफ्नो पहिलो प्रधानमन्त्रीको कार्यकालमा सिङ्गो मुलुकलाई प्रविधिमैत्री तुल्याउन डिजिटल नेपालको फ्रेम वर्क तयार गरेको र अहिले त्यसलाई कार्यान्वयनको काम भइरहेको बताउँदै हालै आर्टिफिसियल इन्टेलिजेन्ट्स (एआइ) सम्बन्धी नीति ल्याएको उल्लेख गरे । साथै उनले कानुनमा संशोधनमार्फत नेपालमै बसेर सूचना र प्रविधिका क्षेत्रमा विदेशमा कम्पनी खोल्न सकिने व्यवस्था गरिएको पनि उनले स्मरण गरे ।
“हामी देश, समाज र सिङ्गै मानव जातिलाई अझ उन्नत र परिष्कृत बनाउन सूचना प्रविधिको उपयोग गर्नुपर्छ । सुशासन कायम र भ्रष्टाचार नियन्त्रणमा यसलाई प्रयोग गर्दै विकासमा व्यापकता, सामाजिक सद्भाव र नवीनताका लागि सहयोग लिन आग्रह गर्दछु ।’’, प्रधानमन्त्री ओलीले भने, “हामीले गत वर्षको एसइईमा अनलाइन कक्षाका माध्यमबाट १४ प्रतिशतसम्म नतिजामा सुधार ल्याउन सकेका छौँ । यस्तै स्वास्थ्य र अन्य क्षेत्रमा पनि सूचना प्रविधिको उपयोग गर्दै आएका छौँ । यसको दुरुपयोगबाट हुने कमीकमजोरी र विकृतिप्रति हामी सजग हुनुपर्छ ।’’
प्रधानमन्त्री ओलीले सरकार प्रेस तथा अभिव्यक्तिका पक्षमा रहेको स्पष्ट गर्दै समाजलाई हानी पुग्ने खालका सूचना सम्प्रेषण भने गर्न नहुने बताए।