कुखुरामा रक्तअल्पता देखियो
नारायणगढ, भदौ ४ — चितवनमा कुखुरामा रक्तअल्पता गराउने ‘चिकेन एनेमिया’ भाइरस देखिएको छ। राष्ट्रिय पन्छी रोग अन्वेषण प्रयोगशालाका अनुसार तीन महिनामा परीक्षण भएका ९२ नमुनामध्ये ३१ मा यो रोग पुष्टि भएको हो।
प्रयोगशालाका प्रमुख डा. विजयकुमार श्रेष्ठले यस रोगले कुखुरामा रोग प्रतिरोधात्मक क्षमता कम हुने, तौल नबढ्ने र उत्पादनमा कमी आउने बताए। वर्तमानमा चितवनमा ब्रोइलर कुखुराको मृत्युदर १०–१६ प्रतिशत पुगेको छ, जुन सामान्य दरभन्दा बढी हो।
कुखुरालाई यो रोगबाट बचाउन भ्याक्सिन आवश्यक रहेको विज्ञहरूले औँल्याएका छन्। ‘चिकेन एनेमिया’ सहित अन्य रोगले कुखुरामा आक्रमण गर्दै व्यवसायिक उत्पादनमा असर पुर्याएको बताइएको छ।
चितवन देशको प्रमुख कुखुरापालन केन्द्र भएकोले रोग नियन्त्रणका दीर्घकालीन योजना अघि सार्न विज्ञहरूले सुझाव दिएका छन्।