नुवाकोटको तादीमा खोलाले बगाउँदा स्कुले छात्राको गयो ज्यान, शोकमा डुब्यो गाउँ
नुवाकोट, भदौ १८ । अविरल वर्षापछि आएको बाढीले नुवाकोटको तादी गाउँपालिका–२ चिलाउनेमा एक परिवारलाई असह्य पीडा दिएको छ । बुधबार साँझ करिब ४:३० बजेतिर विद्यालय छुट्टी भएपछि घर फर्कँदै गरेका बालबालिकाहरू स्थानीय काभ्रे खोलाको धारमा पुगेका थिए । सामान्यतया खेल्दै–गफिँदै बाटो काट्ने ती बालबालिकाको यात्रा आज भने नियतिको खेलमा बदलियो ।
खोलामा आकस्मिक रूपमा आएको ठूलो भेलले रामबहादुर तामाङकी ४ वर्षीया छोरी सतिकला तामाङलाई बगायो । उनको मृत शरीर फेला पर्दासँगै गाउँमाथि गहिरो शोक छायो । विद्यालयमै खेल्दै हाँस्दै गरेका सानी सतिकला केही घण्टामै यसरी नफर्किने भएर जाने कल्पना कसैले गरेका थिएनन् ।
सोही घटनामा सात वर्षीया सुष्मा तामाङ, ११ वर्षीया ज्योती तामाङ र सात वर्षीय ज्योतिष तामाङ पनि बाढीको चपेटामा परे । स्थानीयले तत्काल उद्धार गरेर उनीहरूलाई चिलाउने स्वास्थ्य चौकी पुर्याए । टाउको र छातीमा चोट लागेका उनीहरूको अवस्था मध्यम भए पनि, ज्यान भने जोगिएकोमा परिवारले राहतको सास फेरेका छन् ।
खोलाको छेउछाउमा भेला भएका गाउँले अझै स्तब्ध छन् । “स्कुल जाने–आउने बाटोमै यस्तो दुःखद घटना हुनुपर्छ भनेर कहिल्यै सोचेकै थिइएन,” एक स्थानीयले आँसु झार्दै भने ।
यो घटना बालबालिका मात्र होइन, अभिभावक र गाउँका सबैका लागि त्रासदी बनेको छ । खुला धार र अनियन्त्रित खोलाले अझै पनि जोखिम निम्त्याइरहेको छ । यसबीच इलाका प्रहरी कार्यालय खरानीटारले घटनाबारे थप अनुसन्धान सुरु गरेको जनाएको छ ।
सतिकलाको मृत्युले गाउँभरि शोकको वातावरण छाएको छ भने घाइते भएका तीन बालबालिकाको शीघ्र स्वास्थ्यलाभको कामना गरिँदै छ ।