संसद् विघटनको निर्णयप्रति माओवादी केन्द्रको गम्भीर असहमति
काठमाडौं, भदौ २७ – नेकपा माओवादी केन्द्रले प्रतिनिधिसभा विघटन गर्ने निर्णयप्रति गम्भीर असहमति जनाएको छ।
पार्टी अध्यक्ष पुष्पकमल दाहाल ‘प्रचण्ड’को अध्यक्षतामा बसेको केन्द्रीय पदाधिकारीहरूको आकस्मिक बैठकले संसद् विघटन मुलुकको संवैधानिक व्यवस्थाविपरीत भएको निष्कर्ष निकालेको हो।
बैठकपछि जानकारी दिँदै पार्टीका प्रवक्ता तथा उपाध्यक्ष अग्नि प्रसाद सापकोटाले भने, “वर्तमान परिस्थितिको गम्भीर विश्लेषणपछि संसद् विघटन गर्ने निर्णयप्रति हाम्रो गम्भीर असहमति छ।”
माओवादी केन्द्रले मुलुकलाई संवैधानिक बाटोबाटै अघि बढाउनुपर्ने र संसद् विघटन गर्ने निर्णय त्यसविपरीत भएको ठहर गरेको छ।