कोहलपुरको राजस्व अनुसन्धान कार्यालयबाट लुटिएको नगद, सुन–चाँदी फिर्ता

नेपालगन्ज, भदौ ३१ । भदौ २४ गते जेनजी प्रदर्शनका क्रममा आगजनी भएपछि बाँके, कोहलपुरस्थित राजस्व अनुसन्धान कार्यालयबाट लुटिएको रकम र सुन–चाँदी फिर्ता गरिएको छ।

इलाका प्रहरी कार्यालय कोहलपुरका अनुसार दुई लाख ५२ हजार रुपैयाँ नगद, ४२१ ग्राम सुन र करिब १० किलो चाँदी फिर्ता ल्याइएको हो। फिर्ता गरिएका सामग्री सोमबार राजस्व अनुसन्धान कार्यालयमा जनप्रतिनिधि, समाजसेवी र सुरक्षाकर्मीहरूको उपस्थितिमा बुझाइएको छ।

यसअघि आइतबार प्रहरीले छुट्टै घटनामा सात लाख ६६ हजार रुपैयाँसहित तीन जनालाई पक्राउ गरेको थियो। जिल्ला प्रहरी कार्यालयले फिर्ता नगर्नेहरूमाथि कडा कारबाही गर्ने चेतावनी दिएको छ।