देशभर मनसुनी प्रभाव, धेरै ठाउँमा वर्षाको सम्भावना
काठमाडौं, असोज १४ । देशभर मनसुनी वायु र स्थानीय वायुसँगै वर्षाको प्रभाव जारी रहेको छ। जल तथा मौसम विज्ञान विभाग, मौसम पूर्वानुमान महाशाखाका अनुसार आज सबै प्रदेशका पहाडी भूभागमा साधारणतया बदली रही बाँकी भूभागमा आंशिक बदली रहनेछ।
कोशी, बागमती, गण्डकी, लुम्बिनी, सुदूरपश्चिम र कर्णाली प्रदेशका पहाडी क्षेत्र तथा तराईका केही स्थानमा वर्षा हुने सम्भावना रहेको विभागले जनाएको छ। त्यस्तै, अन्य प्रदेशका पहाडी भूभागका थोरै स्थानमा समेत वर्षा हुन सक्ने देखिएको छ।
तराई भूभागका एक–दुई स्थानमा मेघगर्जन र चट्याङसहित मध्यम वर्षा हुने संभावना रहेको महाशाखाले चेतावनी दिएको छ। विशेषगरी कोशी, बागमती र गण्डकी प्रदेशका पहाडी क्षेत्रका एक–दुई स्थानमा भारी वर्षा हुन सक्ने प्रक्षेपण गरिएको छ।
आज राति कोशी, मधेश र बागमती प्रदेशका पहाडी भूभागमा साधारणतया बदली रहनेछ भने बाँकी भूभागमा आंशिक बदली रहने महाशाखाले जनाएको छ। यस अवधिमा कोशी, बागमती र गण्डकी प्रदेशका केही स्थानसहित देशका अन्य भूभागका कतिपय ठाउँमा मध्यम वर्षाको सम्भावना रहेको विभागले उल्लेख गरेको छ।