हमासको कब्जामा रहेका नेपाली विद्यार्थी विपिन जोशी अब जीवित छैनन्

रेडक्रसलाई शव हस्तान्तरण गर्न तयारी, बीबीसी र टाइम्स अफ इजरायलको पुष्टि

काठमाडौं,असोज २७ । लामो समयदेखि प्रतीक्षा गरेका नेपाली विद्यार्थी विपिन जोशी जीवितै फर्कने आशा अब निराशामा परिणत भएको छ। अन्तर्राष्ट्रिय सञ्चार माध्यम बीबीसी र टाइम्स अफ इजरायलले जोशी जीवित नरहेको पुष्टि गर्दै समाचार प्रकाशित गरेका छन्।

टाइम्स अफ इजरायलका अनुसार, इजरायल र हमासबीच जारी युद्धका बीच हमासले सोमबार चारजना मृत बन्धकको नाम सार्वजनिक गरेको छ, जसमा एक नेपाली विद्यार्थी विपिन जोशी पनि छन्। हमासले ती बन्धकहरूको शव रेडक्रसलाई हस्तान्तरण गर्ने तयारी भइरहेको जनाएको छ।

हमासले सार्वजनिक गरेको सूचीमा रहेका चार जना गाई इलुज, योसी साराबी, विपिन जोशी र ड्यानियल पेरेज रहेका छन्। तर शव हस्तान्तरण कहिले र कहाँ हुने भन्ने विवरण भने सार्वजनिक गरिएको छैन।

विपिन जोशी नेपालका कृषि विद्यार्थी थिए, जो अध्ययनका लागि इजरायल पुगेका थिए। सन् २०२३ को अक्टोबर ७ (२०७९ असोज २३) मा हमासले किबुज आलुमिमबाट उनीसहित अरूलाई अपहरण गरेको थियो। उनको जीवित रहेको प्रमाण मंसिर महिनासम्मको भिडियोमार्फत पुष्टि भएको थियो।

अन्य मृतकहरूमध्ये इलुजलाई नोभा संगीत उत्सवबाट अपहरण गरिएको थियो, ड्यानियल पेरेज (२२) इजरायली सेनाका पल्टुन कमाण्डर थिए, र ५३ वर्षीय योसी साराबीलाई आफ्नै घरबाट अपहरण गरी हत्या गरिएको थियो।

इजरायली सेनाका अनुसार, रेडक्रसका प्रतिनिधिहरू चारैजनाको शव बुझ्नका लागि दक्षिण गाजातर्फ प्रस्थान गरिरहेका छन्।

बीबीसीका अनुसार, हमासले विगत ७३८ दिनदेखि आफ्नो नियन्त्रणमा रहेका जोशीको शव इजरायललाई बुझाउने जनाएको छ। यसअघि जोशीको अवस्था अज्ञात रहेको बताइएको थियो।

इजरायल–हमास द्वन्द्वको यस घटनाले एक वर्षअघि भएको ७ अक्टोबर २०२३ को हमास आक्रमणपछि पुनः मानवीय संकट उजागर गरेको छ। सो आक्रमणमा सयौँले ज्यान गुमाएका थिए र अझै पनि थुप्रै बन्धकहरूको अवस्थाबारे स्पष्टता आउन बाँकी छ।