विपिन जोशीको राष्ट्रिय सम्मानसहित आज अन्त्येष्टि
कञ्चनपुर,कात्तिक ४— इजरायल हमलाको क्रममा बन्धक बनेका नेपाली विद्यार्थी विपिन जोशीको आज (मंगलबार) राष्ट्रिय सम्मानसहित अन्त्येष्टि गरिने भएको छ। कञ्चनपुरको भीमदत्त नगरपालिका–३ स्थित उनको निवासबाट बिहान शवयात्रा सुरु गरी महाकाली नदीको भुजेला घाटमा अन्त्येष्टि गरिने कार्यक्रम तय गरिएको हो।
२०७९ सालमा अध्ययनका लागि इजरायल पुगेका जोशीलाई गत वर्ष अक्टोबर ७ मा हमासले गरेको आक्रमणका क्रममा बन्धक बनाएको थियो। त्यसयता उनको अवस्था अज्ञात रहँदै आएकोमा गत असोज २७ गते इजरायल सरकारले उनको मृत्यु पुष्टि गरेको थियो।
सोमबार इजरायलले जोशीको शव नेपाल पठाएको थियो। नेपाली सेनाको स्काई ट्रकमार्फत काठमाडौं ल्याइएको शव धनगढी विमानस्थल हुँदै परिवारको जिम्मा लगाइएको हो।
यसक्रममा नेपालका लागि इजरायली राजदूत श्मुलिक आरी बाससहितको प्रतिनिधिमण्डल पनि कञ्चनपुर पुगेको थियो। राजदूतसहितको टोलीले जोशीको निवासमा पुगेर परिवारजनलाई समवेदना व्यक्त गर्दै शव हस्तान्तरण गरेको थियो।
विपिन जोशीको निधनले देशभरका नेपाली विद्यार्थी तथा नागरिकलाई गहिरो दुःखमा पारेको छ। सरकारका तर्फबाट उनलाई राष्ट्रिय सम्मानसहित अन्त्येष्टि गर्ने निर्णय गरिएको हो।