युक्रेन युद्धका बीच रुसले गर्यो आणविक अभ्यास
काठमाडौ,कात्तिक ५ । रुसले बुधबार आफ्नो तालिकाअनुसार आणविक अभ्यास गरेको छ। युक्रेन युद्धलाई लिएर युरोपमा बढ्दो तनावका बीच गरिएको यो अभ्यासले पुनः क्षेत्रीय अस्थिरता चर्काउने संकेत दिएको छ।
रुसी राष्ट्रपति भ्लादिमिर पुटिनले “हामी योजना अनुसार परमाणु शक्तिलाई प्रशिक्षण दिइरहेका छौँ,” भनेर अभ्यासबारे जानकारी दिएका छन्। उनले यसलाई नियमित तालिकाअनुसारको अभ्यास भन्दै यसले कुनै आक्रामक सन्देश नबोकेको दाबी गरेका छन्।
रुसको यो अभ्यास नेटोले आफ्नो वार्षिक आणविक अभ्यास सुरु गरेको एक सातापछि गरिएको हो। नेटोले गत हप्ता उत्तरी सागर क्षेत्रमा “Steadfast Noon” नामक अभ्यास सञ्चालन गरेको थियो, जसमा विभिन्न सदस्य देशका युद्धविमान र आणविक क्षमतासम्पन्न प्रणाली सहभागी थिए।
रुसको रक्षा मन्त्रालयले सार्वजनिक गरेको भिडियोमा जमिन, समुद्र र आकाशबाट क्षेप्यास्त्र प्रक्षेपण गरिएको दृश्य देखिन्छ। अभ्यासमा सामरिक मिसाइल फोर्स, नौसेना र हवाई सेनाको संयुक्त सहभागिता रहेको बताइएको छ।
यो अभ्यास त्यस्तो समयमा गरिएको हो, जब युक्रेन युद्ध अन्त्यका लागि कूटनीतिक पहल सुस्त बनेको छ र अमेरिकी राष्ट्रपति डोनाल्ड ट्रम्पले पुटिनसँगको प्रस्तावित शान्ति वार्ता स्थगित गरेका छन्। विश्लेषकहरूले रुसको यो कदमलाई शक्ति प्रदर्शन र पश्चिमी देशहरूलाई चेतावनीको सन्देशका रूपमा व्याख्या गरेका छन्।