उत्तरी गोरखाका गाउँमा लगातार हिमपात, जनजीवन र पर्यटक प्रभावित

गोरखा,कात्तिक ११— उत्तरी गोरखाका उच्च हिमाली गाउँहरूमा गए रातिदेखि निरन्तर हिमपात भइरहेको छ। चुमनुब्री गाउँपालिकाका विभिन्न बस्तीहरू हिउँले ढाकिएपछि स्थानीयको दैनिक जीवन प्रभावित भएको छ।

चुमनुब्री गाउँपालिका–७ का स्थानीय पासाङफुञ्जो लामाका अनुसार गए राति ११ बजेतिर वर्षा सुरु भएर राति १ बजेदेखि हिउँ पर्न थालेको हो। “अहिलेसम्म पनि हिउँ परिरहेको छ, सबै गाउँ सेताम्मे बनेको छ,” उनले बताए। “मानिसहरू घरभित्रै आगो तापेर बसेका छन्, चौरीहरू पनि गोठभित्रै राखिएका छन्।”

तीन हजार मिटरभन्दा माथि रहेका निले, छुले, पाङदुन, लार, फुर्पे, लामागाउँ, बुर्जी, जोङ र छेकमलगायत गाउँहरू हिउँको बाक्लो तहले ढाकिएका छन्। त्यस्तै, वडा नं. १ का सामागाउँ र साम्दो, वडा नं. २ का स्याला र ल्हो गाउँमा पनि बाक्लो हिमपात भएको स्थानीयहरूले बताएका छन्।

हिउँ परेपछि मनास्लु क्षेत्र भ्रमणमा गएका आन्तरिक र विदेशी पर्यटकहरू पनि प्रभावित भएका छन्। ५,१०६ मिटर उचाइको लार्के पासतर्फ गएका भरिया (trekkers) हरू भारी हिमपातका कारण सामागाउँ र साम्दोमै रोकिएका छन्।

हिमपातका कारण स्थानीय आवतजावत, सञ्चार र पशुपालनमा समेत असर परेको जनाइएको छ। जिल्ला प्रशासन कार्यालय गोरखाले हिमाली क्षेत्रमा आवश्यक सतर्कता अपनाउन र अनावश्यक यात्रा नगर्न आग्रह गरेको छ।