१६ वर्षदेखि शौचालयबिनै विद्यालय, विद्यार्थी खुला आकाशमुनि दिसापिसाब गर्न बाध्य

सप्तरी, कात्तिक २५ ।  राजविराज नगरपालिकाभित्र रहेको एक आधारभूत विद्यालय १६ वर्षदेखि शौचालयबिनै सञ्चालनमा रहेको खुलेको छ। विद्यालयमा शौचालय, कक्षा कोठा र आधारभूत भौतिक संरचनाको अभावले शिक्षक–विद्यार्थी दुवै मर्कामा परेका छन्।

राजविराज–१० कदमाहास्थित श्री गायत्री जगदीश सावित्री सुध आधारभूत विद्यालय २०६६ सालमा स्थापना भएको हो। तर, यसको १६ वर्षे इतिहासमा एकपटक पनि शौचालय निर्माण नहुनुले विद्यार्थी र शिक्षक/शिक्षिकालाई खुला ठाउँमा नै दिसापिसाब गर्नुपर्ने बाध्यता कायम छ।

बालविकासदेखि कक्षा ४ सम्म सञ्चालन भइरहेको विद्यालयमा जम्मा दुई वटा कोठा मात्रै छन्। यही दुई कोठामै पाँच कक्षाहरू सञ्चालन गर्नुका साथै विद्यार्थीका लागि खाजा पकाउने तथा विद्यालयको कार्यालयसमेत सञ्चालन हुँदै आएको प्रधानाध्यापक सुष्मा यादवले बताउनुभयो।

“६४ विद्यार्थी पढ्ने विद्यालयमा कक्षा कोठा र शौचालय अत्यावश्यक भएको repeatedly निवेदन दिए पनि अहिलेसम्म सुनुवाइ भएन,” उहाँले चिन्ता व्यक्त गर्नुभयो। विद्यालय आउन–जाँदा विद्यार्थीलाई बाटोसमेत नहुँदा खेतको आलीबाट जोखिम मोलेर हिँड्नुपर्ने अवस्था रहेको पनि उहाँले बताउनुभयो।

विद्यालयमा एक जना राहत तथा चार जना निजी स्रोतका गरी पाँच शिक्षक/शिक्षिका कार्यरत छन्। सोही वडाको मट्टीगढीस्थित राष्ट्रिय आधारभूत विद्यालयमा पनि भौतिक संरचनाको अभावकै बीच चार कोठामा ६ कक्षा सञ्चालन भइरहेका छन्। “कोठा र व्यवस्थापन अभावका कारण गुणस्तरीय शिक्षामा चुनौती छ,” उक्त विद्यालयका प्रधानाध्यापक महेन्द्र प्रसाद यादवले बताए।

इन्टेलेक्चुअल नेपाल सप्तरीका अध्यक्ष तथा शैक्षिक अभियन्ता डा. सूर्यप्रसाद यादवले नगरभित्रका कमजोर अवस्थाका विद्यालयलाई मर्ज गरी सुदृढ व्यवस्थापनसहित सञ्चालन गर्नुपर्ने सुझाव दिनुभयो।

राजविराज–१० का वडा अध्यक्ष गंगाराम खंगका अनुसार विद्यालयको अवस्था नियमित अनुगमन गर्दा थाहा पाएको भए पनि गायत्री जगदीश सावित्री विद्यालयमा विद्यार्थी संख्या अत्यन्त कम भएकाले व्यवस्थापन गर्न कठीन भएको बताउनुभयो। “विद्यार्थी संख्या वृद्धि र गुणस्तरीय शिक्षा सुनिश्चित नभएसम्म संरचनागत विस्तार चुनौतीपूर्ण छ,” उहाँले भन्नुभयो।

खंगका अनुसार मट्टीगढीको विद्यालयमा देखिएका समस्याहरू समाधानका लागि बजेट छुट्याइएको छ।