नेपालमा दल दर्ताको चहलपहल तीव्र : १२३ दलले प्रमाणपत्र पाए, ३२ दल कागजात अपुग हुँदा प्रक्रियामा

काठमाडौं, मंसिर १ । देशभर राजनीतिक दल खोल्ने उत्साह छ्यापछ्याप्ती फैलिएसँगै निर्वाचन आयोगमा दल दर्ता गर्न आउने भीड बढेको छ । कात्तिक ३० गतेसम्म १२३ दलले दर्ता प्रमाणपत्र प्राप्त गरेका छन् भने ३२ दल आवश्यक कागजात अपुग हुँदा अझै दर्ता प्रक्रियामै छन्। जेनजी आन्दोलनपछि सार्वजनिक जीवनमै भएका विभिन्न क्षेत्रका व्यक्तिहरू आफ्नै नेतृत्वमा नयाँ राजनीतिक दल दर्ता गराउन आयोग धाइरहेका छन् ।

विगतमा पूर्वप्रधानमन्त्री डा. बाबुराम भट्टराईका सल्लाहकार रहेका प्रशान्त सिंहले ‘पिपुल फर्स्ट पार्टी’ दर्ता गराउने प्रयास अघि बढाएका छन् भने पूर्वसचिव इन्जिनियर अनुपकुमार उपाध्यायले ‘उज्यालो पार्टी नेपाल’ दर्ता प्रक्रियामा छन् । सो पार्टीको समिति इन्जिनियर र चिकित्सकको प्रमुख सहभागितामा बनेको छ । सुदूरपश्चिम प्रदेश सदस्य डा. तारा जोशीसमेत यसमा समावेश छन्।

२०७५ फागुनमा प्रतिबन्धित गतिविधिमा संलग्नताको आरोपमा चर्चित बनेको नेत्रविक्रम चन्द समूहले पनि ‘कम्युनिस्ट पार्टी नेपाल’ नाममा दर्ता निवेदन दिएको छ, तर कागजात अपुग रहेकाले मान्यता पाएको छैन ।

यसैबीच दिनेशराज प्रसाई नेतृत्वको ‘गतिशील लोकतान्त्रिक पार्टी’ ले दर्ता प्रमाणपत्र पाइसकेको छ, जहाँ बुद्ध एयरका कार्यकारी अध्यक्ष वीरेन्द्रबहादुर बस्नेतसमेत संलग्न छन् । उद्यमी गोपीलाल न्यौपानेले आर्थिक उदारवाद र स्वतन्त्रताको पक्षमा ‘नेपाल लिभरल पार्टी’ दर्ताका लागि निवेदन दिएका छन्।

जेनजी आन्दोलनपछि सक्रिय बनेका युवाहरूले पनि दल दर्ता प्रक्रियामा उपस्थित छन् । ‘राष्ट्रिय जेनजी पार्टी नेपाल’ आवश्यक कागजात नपुगेपछि निवेदन फिर्ता लिन बाध्य भएको छ भने आन्दोलनताका घाइते राजेश प्रतेलको नेतृत्वमा नयाँ दल दर्ता प्रक्रिया अघि बढिरहेको छ । सो दलका अधिकांश सदस्य २८ वर्षमुनिका छन्।

धरानका स्वतन्त्र प्रमुख हर्कराज राईले ‘श्रम संस्कृति पार्टी’ दर्ता गराएका छन् भने किशोरी कार्की नेतृत्वको ‘नवनिर्माण पार्टी’ पनि कागजात अपुग भएकै कारण प्रक्रियामा छ । राजतन्त्र समर्थकदेखि आर्थिक उदारीकरण र नागरिक स्वतन्त्रताको बहस उठाउने दलहरू समेत आयोगमा लाइनमा छन्।

आयोगका कार्यवाहक प्रमुख आयुक्त रामप्रसाद भण्डारीका अनुसार कात्तिक ३० गतेसम्म दर्ताका लागि निवेदन दिएका दलहरूलाई मंसिर १० गतेभित्र प्रमाणपत्र प्राप्त भए आगामी निर्वाचनमा भाग लिन सकिने व्यवस्था गरिएको छ । मंसिर १ देखि १० गतेसम्म निर्वाचन प्रयोजनका लागि दल दर्ता प्रक्रिया औपचारिक रूपमा सञ्चालन हुँदैछ।