मधेश प्रदेशका पाँच प्रदेशसभा सदस्यलाई पदमुक्त नगर्न सर्वोच्चको आदेश
जनकपुरधाम,मंसिर १ । मधेश प्रदेशका पाँच प्रदेशसभा सदस्यलाई पदमुक्त नगर्न सर्वोच्च अदालतले अन्तरिम आदेश दिएको छ। सभामुख रामचन्द्र मण्डलले कात्तिक २७ गते जनता समाजवादी पार्टी नेपाल र नागरिक उन्मुक्ति पार्टीका ती पाँच सदस्यलाई पदमुक्त गरेका थिए।
न्यायाधीश नित्यानन्द पाण्डेयको एकल इजलासले जारी गरेको आदेशमा सभामुख मण्डललाई उनीहरूलाई तत्काल पदमुक्त नगर्न निर्देशन दिएको हो।
पदमुक्त गरिएका सदस्यहरू—जनता समाजवादी पार्टी नेपालका मनिषकुमार सुमन, सञ्जयकुमार यादव, सिंहासन साह कलवार, शारदा शंकर साह कलवार र नागरिक उन्मुक्ति पार्टीकी उर्मिला सिंह—लाई लगातार १० दिन प्रदेशसभा बैठकमा अनुपस्थित रहेको आधारमा पदमुक्त गरिएको थियो।
सभामुखको निर्णयविरुद्ध ती सदस्यहरूले सर्वोच्च अदालतमा रिट दायर गरेका थिए। सर्वोच्चको आदेशसँगै उनीहरू हालका लागि पुनः पदमै कायम रहने भएका छन्।