विदुर खानेपानी उपभोक्ता संस्थाको चुनाव : अध्यक्षमा संजीव बहादुर श्रेष्ठ विजयी
नुवाकोट,मंसिर १५ । विदुर खानेपानी तथा सरसफाई उपभोक्ता संस्थाको नवौँ अधिवेशनबाट संजीव बहादुर श्रेष्ठ अध्यक्षमा निर्वाचित भएका छन्। शनिबार सम्पन्न निर्वाचनको मतगणनाको अन्तिम परिणाम अनुसार श्रेष्ठले १ हजार ३७० मत प्राप्त गर्दै विजयी बनेका हुन्।
श्रेष्ठ नेकपा एमाले र नेपाली कांग्रेसको गठबन्धनबाट उम्मेदवार बनेका थिए। उनका प्रतिस्पर्धी हरिशरण गजुरेलले ७३७ मत प्राप्त गरे। गजुरेलको प्यानललाई नेकपा, रास्वपा र राप्रपाको समर्थन थियो।
उपाध्यक्षमा १ हजार ६१ मतसहित राजेन्द्र पाण्डे विजयी भए भने उनका निकटतम प्रतिस्पर्धी नविन प्रधानले ९६९ मत पाए।
सचिवमा रघुनाथ रिमालले १ हजार ६१ मत प्राप्त गर्दै जितेका छन्। उनका प्रतिस्पर्धी अच्चुतराज महन्त गिरीले ९२२ मत पाए।
कोषाध्यक्षमा १ हजार १६७ मतसहित अम्बिका चित्रकार खनाल विजयी भइन्। उनका प्रतिस्पर्धी संगीता कोइरालाले ८२५ मत प्राप्त गरिन्।
महिला सदस्यतर्फ सिता अधिकारी (१,१०३ मत) र बिन्दाकुमारी सडौला (१,०८५ मत) निर्वाचित भए।
सदस्यतर्फ शंकर पाण्डेले १,०६६, दीपक कुमार तिमिल्सिनाले १,०४४ र गोबिन्दबहादुर अधिकारीले ९४५ मत प्राप्त गर्दै विजय हासिल गरेका छन्।
झण्डै ३ हजार ६६५ मतदाता रहेको निर्वाचनमा २ हजार ३४६ मत खसेको निर्वाचन कार्यालयले जनाएको छ। तीमध्ये १०१ मत बदर भएको थियो।
नयाँ नेतृत्व चयनसँगै खानेपानी तथा सरसफाइ सेवा अझ प्रभावकारी बनाउने प्रतिवद्धता नवनिर्वाचित पदाधिकारीहरूले व्यक्त गरेका छन्।