सिन्धुपाल्चोक ज्यामिरेका बालबालिकाको सीप–शिक्षा : विद्यालयमै डोको–चकटी बुनेर आम्दानी
सिन्धुपाल्चोक,मंसिर २५ । मेलम्ची नगरपालिका–९, ज्यामिरेस्थित क्यौलेठाना आधारभूत विद्यालयका छात्रछात्रा अब किताबसँगै जीवनोपयोगी सीप पनि सिक्दै आम्दानी लिन थालेका छन्। कक्षा १ देखि ८ सम्मका १०८ विद्यार्थी रहेको विद्यालयले ‘बुक फ्री फ्राइडे’ कार्यक्रममार्फत प्रत्येक शुक्रबार व्यावहारिक शिक्षा सञ्चालन गर्न थालेपछि बालबालिकामा उत्साह बढेको छ।
प्रधानाध्यापक भरतकुमार मल्लका अनुसार स्थानीय प्रशिक्षकको सहयोगमा विद्यार्थीलाई निगालोबाट डोको र मकैको खोस्टाबाट चकटी बुन्न सिकाइँदै आएको छ। स्थानीय सामग्रीमै आधारित सीप सिकाइले विद्यार्थीमा आत्मविश्वास र उपयोगी सीप दुवै विकास भइरहेको मल्लले बताउनुभयो।
शुक्रबार पुस्तकमुक्त शिक्षण लागू भएपछि विद्यार्थीले डोको–चकटीसँगै करेसाबारीमा तरकारी खेती, नगदेबाली, सरसफाइ र सामूहिक कार्यसमेत सिक्ने गरेका छन्। यसले विद्यार्थीको अध्ययन क्षमतामा उल्लेखनीय सुधार ल्याएको शिक्षक तथा अभिभावकहरूको भनाइ छ।
विद्यालयका विद्यार्थीले ‘गुफा आवाज’ नामक मासिक बाल भित्तेपत्रिका प्रकाशन गर्दै साहित्य, कला, सङ्गीत र उद्घोषण जस्ता अतिरिक्त गतिविधिमा पनि सक्रियता बढाएका छन्।
निगालोबाट डोको बुन्दै महिनामा तीन–चार हजार रुपैयाँसम्म कमाइ गर्न थालेको कक्षा ६ का समीर तामाङ भन्छन्, “स्कूलमै सिकेको सीपले आम्दानी गर्न पाउँदा धेरै प्रेरणा मिलेको छ।” कक्षा ५ की मञ्जु तामाङले पनि मकैको खोस्टाबाट चकटी बुनी आम्दानी कमाउन थालेको बताइन्।
व्यावहारिक सीपमै आधारित शिक्षा विस्तार हुँदै जाँदा सामुदायिक विद्यालयप्रतिको विश्वास पनि थप मजबुत बन्दै गएको स्थानीयको अनुभव छ।