एमाले महाधिवेशनमा ओली–पोखरेलबीच अध्यक्ष पदको प्रतिस्पर्धा, निर्वाचन तालिका सार्वजनिक
काठमाडौँ, मङ्सिर २९ — नेपाल कम्युनिस्ट पार्टी (एमाले) को जारी ११ औँ राष्ट्रिय महाधिवेशनमा अध्यक्ष पदका लागि वर्तमान अध्यक्ष केपी शर्मा ओली र वरिष्ठ उपाध्यक्ष ईश्वर पोखरेलबीच प्रतिस्पर्धा हुने भएको छ। भक्तपुरको सल्लाघारीमा उद्घाटन गरिएको महाधिवेशनको बन्दसत्र काठमाडौँको भृकुटीमण्डपमा जारी छ।
अध्यक्ष ओलीले आफू पुनः अध्यक्षमा निर्वाचित हुनेमा ढुक्क रहेको दाबी गर्नुभएको छ। उहाँले मुलुकको लोकतन्त्र, संविधान र अग्रगमन सङ्कटमा रहेको उल्लेख गर्दै त्यसको रक्षाका लागि एमाले एकताबद्ध भएर अघि बढ्नुपर्ने बताउनुभयो। एमाले जुटेर सङ्घर्ष गर्दा मात्रै उपलब्धि हात लाग्ने उहाँको धारणा छ।
यता अध्यक्षको उम्मेदवारी घोषणा गर्नुभएका वरिष्ठ उपाध्यक्ष पोखरेलले अध्यक्ष ओलीलाई पार्टीको अभिभावकको भूमिकामा बस्न सुझाव दिनुभएको छ। ओली ११ वर्ष पार्टी अध्यक्ष र छ वर्ष प्रधानमन्त्री भइसकेकाले अब नयाँ पुस्तालाई नेतृत्व हस्तान्तरण गर्नुपर्ने उहाँको भनाइ छ। पोखरेल २०३२ सालदेखि केन्द्रीय कमिटीमा निरन्तर काम गर्दै आएका अनुभवी नेताका रूपमा चिनिनुहुन्छ।
राजनीतिक विश्लेषकहरूका अनुसार ओली र पोखरेलबीचको प्रतिस्पर्धाले महाधिवेशनलाई थप चासोपूर्ण बनाएको छ। विधान संशोधन र संरचनागत समायोजनका विषयमा समेत दुवै पक्षबीच मतभेद देखिएको छ। यद्यपि पार्टीले पुरानै विधानको मूल मर्म नबदल्ने र आवश्यक संरचनागत समायोजन मात्र गर्ने निर्णय गरेको प्रचार विभागले जनाएको छ।
महाधिवेशनका लागि निर्वाचन तालिका सार्वजनिक भइसकेको छ। केन्द्रीय निर्वाचन आयोगका अनुसार मतदाता नामावली प्रकाशन, दाबी–विरोध, उम्मेदवारी दर्ता र फिर्तालगायतका प्रक्रिया पूरा भएपछि पुस १ गते मङ्गलबार मतदान हुनेछ। मतदान विद्युतीय भोटिङ मेसिनमार्फत हुने र सोही दिन मतगणना तथा नतिजा घोषणा गरिने निर्वाचन समितिले जनाएको छ।
यसैबीच महाधिवेशनलाई लक्षित गरी सुरक्षा व्यवस्था चुस्त बनाइएको छ। उद्घाटन समारोहदेखि बन्दसत्रसम्म कार्यक्रम शान्तिपूर्ण, अनुशासित र व्यवस्थित रूपमा सञ्चालन भइरहेको छ। उपत्यका प्रहरी कार्यालयका अनुसार हजारौँ सुरक्षाकर्मी, स्वयंसेवक, सादा पोसाकका प्रहरी तथा विशेष सुरक्षा टोली परिचालन गरिएको छ।
महाधिवेशनमा देशभरबाट दुई हजारभन्दा बढी प्रतिनिधि, हजारौँ कार्यकर्ता, शुभेच्छुक तथा आमन्त्रित पाहुनाको सहभागिता रहेको छ। एमालेले सभ्य, शान्तिपूर्ण र अनुशासित महाधिवेशनमार्फत नयाँ नेतृत्व चयन गर्ने तयारी गरेको छ।