नेकपा (माओवादी) ले सार्वजनिक गर्यो चुनावी घोषणापत्र
काठमाडौं, माघ १८ । नेपाली कम्युनिष्ट पार्टी (माओवादी) ले गरिब जनताको आर्थिक अवस्था सुधार गर्ने लक्ष्यसहित विभिन्न आर्थिक तथा सामाजिक एजेन्डा समेटेर आफ्नो चुनावी घोषणापत्र सार्वजनिक गरेको छ।
आज आयोजित पत्रकार सम्मेलनमा महासचिव नेत्रविक्रम चन्द्र ‘विप्लव’ को उपस्थितिमा आगामी फागुन २१ गते हुने प्रतिनिधिसभा सदस्य निर्वाचनका लागि घोषणापत्र सार्वजनिक गरिएको हो।
शान्तिपूर्ण राजनीतिमा आएपछि पहिलो पटक निर्वाचनमा सहभागी हुन लागेको उक्त दलले पुँजीवादी, दलाल र साम्राज्यवादी नीति तथा संस्कृतिको अन्त्य गर्दै धनी–गरिबबीचको खाडल घटाउने प्रतिबद्धता जनाएको छ।
महासचिव चन्द्रले शिक्षा र स्वास्थ्यलाई सर्वसुलभ बनाउने, रोजगारीको सुनिश्चितता गर्ने तथा निजी क्षेत्रले मनपरी शुल्क निर्धारण गर्न नपाउने व्यवस्था गर्नुपर्ने बताए। कृषिलाई आत्मनिर्भर बनाउने, विज्ञान तथा प्रविधिमा लगानी वृद्धि गर्ने र युवालाई उत्पादनशील क्षेत्रमा आकर्षित गर्ने विषयमा पनि घोषणापत्र केन्द्रित रहेको उनले जानकारी दिए।
व्यापार तथा लगानी वृद्धि गर्दै मुलुकलाई समृद्ध बनाउने लक्ष्यसहित घोषणापत्र तयार गरिएको पार्टीले जनाएको छ।