निर्वाचन प्रहरी आन्दोलनमा
हुम्ला,फागुन ५ – सेवा–सुविधाप्रति असन्तुष्टि जनाउँदै हुम्लामा भर्ना गरिएका निर्वाचन प्रहरीहरूले जिल्ला प्रशासन कार्यालय हुम्ला अगाडि नाराबाजी गर्दै प्रदर्शन गरेका छन्।
आगामी फागुन २१ गते हुने प्रतिनिधिसभा सदस्य निर्वाचनका लागि हुम्लामा ५ सय ९५ जना निर्वाचन प्रहरी भर्ना गरिएको छ। उनीहरूले पहिले जानकारी गराइएकोभन्दा कम तलब दिन लागिएको भन्ने सूचना पाएपछि आन्दोलनमा उत्रिएको बताएका छन्।
निर्वाचन प्रहरीलाई प्रहरी जवानको प्रारम्भिक तलबमानअनुसार प्रतिदिन ८ सय ६९ रुपैयाँ ४० पैसाका दरले ४० दिनका लागि ३४ हजार ७ सय ७६ रुपैयाँ पारिश्रमिक उपलब्ध गराउने व्यवस्था छ। साथै मतदानको दिन अघिपछि गरी चार दिनका लागि प्रतिव्यक्ति दैनिक ३०० रुपैयाँका दरले एकमुष्ट १ हजार २०० रुपैयाँ खाजा खर्च दिने प्रावधान छ।
हिमाली क्षेत्रमा खटिने म्यादी प्रहरीहरूले पहाडी र तराई क्षेत्रको तुलनामा अतिरिक्त सुविधा पाउने व्यवस्था छ। सोहीअनुसार हिमाली क्षेत्रमा प्रति प्रहरी करिब ११ हजार ५ सय ७० रुपैयाँ थप खर्च उपलब्ध हुने प्रावधान रहेको जनाइएको छ।
टेककुमार रेग्मी, प्रमुख जिल्ला अधिकारी, ले निर्वाचन प्रहरीहरूले सेवा–सुविधासम्बन्धी विषय उठाएर विरोध जनाएको र त्यसबारे आवश्यक बुझाइ तथा समन्वय भइरहेको जानकारी दिनुभएको छ।