नुवाकोटमा पहिरो अपडेट: थप एक जनाको मृत्यु, मृतक संख्या २ पुग्यो
नुवाकोट, चैत ११ — शिवपुरी गाउँपालिका–३ लक्ष्मेश्वरी क्षेत्रमा पहिरो जाँदा स्काभेटर (डोजर) पुरिँदा दुई जनाको ज्यान गएको छ।
स्थानीयका अनुसार पहरा फुटाउने क्रममा अचानक आएको पहिरोले स्काभेटर पुरिँदा चालक २४ वर्षीय अमृत तामाङ र स्थानीय उपभोक्ता समितिका सदस्य फुलमान तामाङको घटनास्थलमै मृत्यु भएको हो।
जिल्ला प्रहरी कार्यालय नुवाकोटका अनुसार पहिरो एक्कासी खसेर स्काभेटर पूर्ण रूपमा पुरिएको थियो। चालक तामाङको शव क्षतविक्षत अवस्थामा फेला परेको छ भने अर्का मृतकको शव निकाल्ने प्रयास भइरहेको जनाइएको छ। घटनामा स्काभेटरसमेत टुक्राटुक्रा भएको छ।
घटनास्थलमा नेपाल प्रहरी, नेपाली सेना र स्थानीयवासीको सक्रिय सहभागितामा उद्धार कार्य जारी रहेको छ। घटनाबारे थप विवरण आउन बाँकी रहेको प्रहरीले जनाएको छ।
पहिरोको जोखिम उच्च रहेको क्षेत्र भएकाले स्थानीयवासीलाई सतर्क रहन प्रशासनले आग्रह गरेको छ।