दुई दिने बिदापछि अस्पतालको ओपीडी सेवामा अन्योल, बिरामी मारमा
काठमाडौं,चैत २९ । सरकारले लागू गरेको दुई दिने साप्ताहिक बिदाको नीतिपछि देशभरका अस्पतालहरूमा आइतबार ओपीडी सेवा सञ्चालन गर्ने कि नगर्ने भन्ने विषयमा अन्योलता देखिएको छ। स्वास्थ्य तथा जनसंख्या मन्त्रालयले सेवा सञ्चालन गर्न निर्देशन दिए पनि जनशक्ति अभाव र बढ्दो कार्यभारका कारण अधिकांश अस्पतालहरूले ओपीडी सेवा बन्द गरेका छन्।
यसका कारण टाढा–टाढाबाट उपचारका लागि आएका बिरामीहरू प्रत्यक्ष प्रभावित बनेका छन्। शनिबार र आइतबार बिदा दिने सरकारी निर्णयसँगै आकस्मिक बाहेकका सेवामा समस्या देखिएको हो।अस्पतालजस्तो अत्यावश्यक क्षेत्रमा निजामती कार्यालयसरह बिदा प्रणाली लागू गर्न खोज्दा व्यवहारिक कठिनाइ उत्पन्न भएको सरोकारवालाहरूको भनाइ छ।
काठमाडौंमै अस्पतालहरूबीच सेवा सञ्चालनमा असमानता देखिएको छ। वीर अस्पताल ले आइतबार पनि ओपीडी सेवा सञ्चालन गरे पनि त्रिभुवन विश्वविद्यालय शिक्षण अस्पताल पुगेका धेरै बिरामी सेवा नपाएर फर्किन बाध्य भएका छन्। सरकारी अस्पतालमा सस्तो उपचारको आशामा आएका सेवाग्राहीहरू विशेषगरी बढी प्रभावित भएका छन्।
यसैबीच नेपाल चिकित्सक संघ ले सार्वजनिक बिदाका दिन ओपीडी सेवा सञ्चालन गर्ने सरकारी निर्णयप्रति असहमति जनाएको छ। संघले जनशक्ति अभाव र बढ्दो कार्यभारका कारण यस्तो निर्णय व्यवहारिक नभएको भन्दै पुनर्विचार गर्न सरकारसँग आग्रह गरेको छ।
संघका अनुसार अस्पताल सेवा अत्यावश्यक भएकाले पूर्ण रूपमा बन्द गर्न नहुने भए पनि ओपीडी सेवा नियमित जाँचका लागि हुने भएकाले बिदाका दिन सञ्चालन गर्नु उपयुक्त नहुने तर्क गरिएको छ। हालको जनशक्तिले अतिरिक्त भार धान्न नसक्ने संघको भनाइ छ।
उता सेवाग्राहीहरूले भने सेवा दिने वा नदिनेभन्दा पनि देशभर एकरूपता आवश्यक रहेकोमा जोड दिएका छन्। हाल राप्ती स्वास्थ्य विज्ञान प्रतिष्ठान, वीर अस्पताल, राष्ट्रिय ट्रमा सेन्टर र भरतपुर अस्पताल ले भने आइतबार पनि ओपीडी सेवा सञ्चालन गर्दै आएका छन्।