भारत जानका लागि गड्डाचौकी पुगेका नेपालीहरु नाकाबाटै फर्काइए
महेन्द्रनगर माघ १६ ।
सीमा नाका खुला भएको सूचना पाएर भारत जान लागेका नेपाली नागरिकहरु गड्डाचौकी नाका बाट फिर्ता हुनु परेको छ ।
मन्त्रीपरिषदको निर्णयले भारतसँग जोडिएका सुदूरपश्चिमका सबै सीमा नाका शुक्रबारदेखि खुला गरेको भए पनि शुक्रबार अपरान्ह भारत जानका लागि गड्डाचौकी पुगेका नेपालीलाई शसस्त्र प्रहरीले सीमा नाकाबाटै फिर्ता पठाएको हो । भारत जान नपाएपछि समस्यामा परेको उनीहरुको गुनासो छ । एक दिन महेन्द्रनगरमा बास बस्नुपर्ने अवस्था आएपछि आफुहरु मार्कामा परेको उनीहरुको गुनासो छ ।
“यहाँ एक दिन होटेलमा बस्नु पर्ने भयो” उनले भने “होटेलमा बस्ने पैसाले हाम्रो गाडी भाडा हुनेथियो ।” शुक्रबारदेखि कैलालीको गौरीफन्टा, कञ्चनपुरको गड्डाचौकी, बैतडीको झुलाघाट र दार्चुलाको खलङ्गा र पुलघाट नाका पूर्ण रुपमा खुला गरिएको जनाए पनि गड्डाचौकी नाकाबाट नेपालीले भारत जान प्रवेश पाएका छैनन् ।
जिल्ला प्रशासन कार्यालयले भने नाका खुला गर्न आन्तरीक तयारीमा जुटेको र शनिबारबाट सहज रुपमा आवतजावत हुने जनाएको छ । सरकारले कोरोना भाइरसको जोखिम रोकथाम तथा नियन्त्रणका लागि भन्दै गत चैत १० गतेदेखि नेपाल–भारत सीमा नाका बन्द गरेको थियो ।
