उपप्रधानमन्त्री पौडेल डिस्चार्ज
काठमाडौ,फागुन ५ । उपप्रधानमन्त्री एवं अर्थमन्त्री विष्णुप्रसाद पौडेल कीर्तिपुरस्थित बर्न अस्पतालबाट आज डिस्चार्ज भएका छन् ।
गत शनिबार पोखरामा आयोजित पोखरा भ्रमण वर्षको उद्घाटन समारोहमा बेलुन फुटेर आगलागी हुँदा घाइते भएका अर्थमन्त्री पौडेल दुई दिनको उपचारपछि आज डिस्चार्ज भएका हुन ।
अस्पतालका निर्देशक डा किरण किशोर नकर्मीले मन्त्री पौडेलको घाउ निको हुँदै गएको र श्वासप्रश्वास प्रणालीका अङ्गहरू र फोक्सोमा कुनै खराबी नदेखिएकाले डिस्चार्ज गरिएको जानकारी दिए । “छालाका घाउहरू निको हुने क्रममा छन् । पुरा निको हुन एक दुई साता लाग्छ, घाउको नियमित ड्रेसिङ गर्नुपर्ने हुन्छ”, डा नकर्मीले भने ।
सोही घटनामा जलनमा परेका पोखरा महानगरपालिकाका प्रमुख धनराज आचार्यको भने उच्च रक्तचापको समस्या भएकाले हृदयरोग विशेषज्ञसँग परामर्श गरी केही दिन उपचार गरिने उनले बताए । “उनको पनि जलन घाउ र त्यससम्बन्धी जटिलता देखिएको छैन”, उनले भने ।
डिस्चार्ज भएपछि उपप्रधान तथा अर्थमन्त्री पौडेलले चिकित्सा टोलीप्रति आभार प्रकट गरेका छन् ।