राजावादीको गतिविधि बढेको भन्दै माओवादीको जागरण अभियान स्थगित
फागुन २५ । नेकपा माओवादी केन्द्रले ‘जनतासँग माओवादीः तराई–मधेस जागरण अभियान’ केही समयको लागि स्थगित गर्ने निर्णय गरेको छ। फागुन महिनाभरका लागि अभियान स्थगित गर्ने निर्णय राजावादी गतिविधि बढिरहेका कारण पार्टी संसदीय र अन्य मोर्चामा सक्रिय रहनुपर्ने आवश्यकता भएको भन्दै लिइएको हो।
यस अभियान अन्तर्गत रौतहटमा कार्यक्रम भएको थियो, र आगामी कार्यक्रमहरू बारामा फागुन २५, पर्सामा २६, चितवनमा २७ फागुनका लागि तय भएका थिए। यद्यपि, अब केन्द्रीय कार्यालयले नयाँ मिति तय गर्ने जनाएको छ। माओवादीले यो अभियान झापाबाट फागुन १२ गते सुरु गरेको थियो, जसमा जनसभा, चोकसभा र अन्तर्क्रिया जस्ता गतिविधिहरू समावेश थिए।
पछिल्लो समय राजावादीहरूले पोखराबाट पूर्वराजा ज्ञानेन्द्र शाहलाई काठमाडौँ फर्किंदा भव्य स्वागत गर्ने तयारी गरेका छन्।