गोकर्णेश्वर महिला हत्या : बागमतीमा बोरामा शव फेला, नुवाकोटका एकसहित पाँच जना पक्राउ

काठमाडौं,फागुन २५ । काठमाडौंको गोकर्णेश्वरमा एक महिलाको हत्या गरी बोरामा प्याक गरेर बागमती नदीमा फालिएको अवस्थामा शव फेला परेको छ। हत्या आरोपमा प्रहरीले नुवाकोटका एक युवकसहित पाँच जनालाई पक्राउ गरेको छ।

पक्राउ पर्नेहरूमा नुवाकोटको मेघाङ–४ देउराली घर भएका २४ वर्षीय रोशन तामाङ, सर्लाहीको बागमती ढुंगेखोला घर भएका २५ वर्षीय कैलाश खड्का, मकवानपुरको हेटौडा शिखरपानी घर भएका २० वर्षीय सुरेश तामाङ, सिन्धुपाल्चोकको तिपिने घर भएकी २० वर्षीया पूजा परियार र एक जना नाबालक रहेका छन् । जिल्ला प्रहरी परिसर काठमाडौंका एसपी तथा प्रवक्ता अपिलराज बोहोराका अनुसार, प्रहरी वृत्त बौद्धको टोलीले उनीहरूलाई पक्राउ गरेको हो।

शनिबार गोकर्णेश्वर नगरपालिका–७ नामी कलेज नजिकको बागमती खोलाको बीच भागमा पानीमा डुबेको अवस्थामा एक महिलाको शव फेला परेको थियो। बोरामा प्याक गरेको अवस्थामा भेटिएको उक्त शव पोस्टमार्टमका लागि त्रिवि शिक्षण अस्पताल पठाइएको छ । घटनाबारे प्रहरीले अनुसन्धान अघि बढाएको छ ।

सो क्रममा ती महिलाको हत्या भएको खुलेको प्रहरीले जनाएको छ। महिलाको अहिलेसम्म पहिचान खुल्न सकेको छैन।