आईपीयू गभर्निङ काउन्सिलको २०६ औं अधिवेशन सुरु, नेपालबाट सभामुख सापकोटासहित तीन सांसद सहभागी
काठमाडौं कार्तिक १७ । विश्वका संसदहरुको साझा मञ्च, अन्तर व्यबस्थापिका संघ (आईपीयू) को गभर्निङ काउन्सिलको २०६ औं अधिवेशन सुरु भएको छ । नेपाली समय अनुसार आइतबार राति सुरु ‘भर्चुअल’ सम्मेलन चार दिनसम्म चल्ने छ ।
जारी अधिवेशनमा नेपालका तर्फबाट संघीय संसद, प्रतिनिधि सभाका सभामुख अग्निप्रसाद सापकोटा, प्रतिनिधि सभाका सदस्य रामकुमारी झाँक्री र राष्ट्रिय सभाका सदस्य जितेन्द्र नारायण देवले गभर्निङ काउन्सिल सदस्यकारुपमा सहभागिता जनाएका छन् । यस्तै अधिवेशनमा सांसद एकवाल मियाँ पर्यवेक्षकका रुपमा सहभागी छन् ।
गभर्निङ काउन्सिलको यो अधिवेशनले आई पि यूका नयाँ अध्यक्ष निर्वाचित गर्ने छ । हरेक गभर्निङ काउन्सिल सदस्यले गोप्य मतदानमार्फत अध्यक्षको चयन गर्ने छन् । मतदान ‘भर्चुअल’ माध्यमबाट भएको छ । अधिवेशनमा नेपाल सहित १६२ देशका प्रतिनिधिहरुको सहभागीता रहेको छ ।
यो अधिवेशनमा आई पि यू को अध्यक्ष पदका लागि पाकिस्तान, पोर्चुगल, उज्वेकिस्तान र क्यानडाका प्रतिनिधिले उमेदवारी दिएका छन् । आई पि यू अध्यक्षको कार्यकाल तीन बर्षको हुने छ ।
यसैबीच नेपालबाट अन्तर व्यबस्थापिका संघ (आईपीयू) को गभर्निङ काउन्सिलको २०६ औं अधिवेशनमा सहभागी सभामुख अग्निप्रसाद सापकोटासहित प्रतिनिधि सभाका सदस्य रामकुमारी झाँक्री र राष्ट्रिय सभाका सदस्य जितेन्द्र नारायण देवले आईपीयू अध्यक्ष चयनका लागि गोप्य मतदान गरेका छन् ।
