चाडपर्वमा उपहार लिनेदिने नगर्न रास्वपाको निर्देशन
काठमाडौं,असोज ३१ । राष्ट्रिय स्वतन्त्र पार्टी (रास्वपा) ले बडादसैँ, तिहार, नेपाल संवत् तथा छठ पर्वका अवसरमा शुभकामना आदानप्रदान गर्दा उपहार लिनेदिने नगर्न पार्टीका नेता तथा कार्यकर्तालाई निर्देशन दिएको छ ।
रास्वपाका महामन्त्री विपिनकुमार आचार्यले शनिबार शुभकामना सन्देश जारी गर्दै पार्टीले स्थापनाकालदेखि नै चाडपर्वका अवसरमा उपहार आदानप्रदानलाई निरुत्साहित गर्दै आएको स्मरण गराउनुभएको हो ।
उहाँले राजनीतिमा नागरिकको सद्भाव, आशीर्वाद र विश्वास नै सबैभन्दा ठूलो उपहार भएको बताउनुभएको छ । चाडपर्वको मूल सन्देश निःस्वार्थ प्रेम, सद्भाव र आत्मीयता रहेको उल्लेख गर्दै उहाँले सुसंस्कृत राजनीतिक संस्कार निर्माणका लागि सबैको साथ र सहयोगको अपेक्षा गर्नुभएको छ ।
महामन्त्री आचार्यले स्वदेश तथा विदेशमा रहेका सम्पूर्ण नेपालीलाई चाडपर्वको शुभकामना व्यक्त गर्नुभएको छ ।