बुटवल आन्दोलन :मुख्यमन्त्री पोखरेलको गाडीमा ढुङ्गामुढा, चार जना पक्राउ
बुटवल असोज १८ ।
प्रदेश ५ का मुख्यमन्त्री शङ्कर पोखरेल चढेको गाडीमा ढुङ्गामुढा भएको छ ।
काठमाण्डौबाट प्रदेशको अस्थायी राजधानी बुटवल फर्किएका मुख्यमन्त्री पोखरेल चढेको गाडीमा ढुङ्गामुढा भएको हो । ढुङ्गा लागेर मुख्यमन्त्रीको गाडीको सिसा फुटेको छ । प्रहरीले ढुङ्गा हानेको आरोपमा नेपाल विद्यार्थी सङ्घका केन्द्रीय उपाध्यक्ष मुक्ति पौडेलसहित चार जनालाई पक्राउ गरेको जनाएको छ ।
प्रदेश ५ को स्थायी राजधानी दाङ सार्ने निर्णयको विरोध गर्दै आइतबार नेपाली कांग्रेसले बुटवलमा बन्दको घोषणा गरेको थियो । बुटवलबाट प्रदेश राजधानी सार्ने प्रस्ताव प्रदेश सभामा पेस भएपछि नेपाली कांग्रेससहित स्थानीयले प्रदर्शन गरिरहेका छन् ।
आइतबार सत्तारुढ नेपाल कम्युनिस्ट पार्टी नेकपाको रुपन्देही जिल्ला कमिटीले पनि प्रदेश ५ को राजधानी दाङ सार्ने पार्टीको निर्णय संविधान विपरीत भएको भन्दै निर्णय कार्यान्वयनमा नलैजान भनेको छ । नेकपाको जिल्ला कमिटीले प्रदेश सार्ने कुराको विरोध गरेपछि नेकपाका नेता कार्यकर्ता पनि विरोधमा निस्किएका छन् । प्रदेश राजधानी तथा नामको प्रस्ताव पारित गर्ने प्रक्रियाका लागि सोमबार प्रदेश सभा बैठक बस्दैछ ।
विरोध गरिरहेका राजनीतिक दल, नागरिक अगुवालगायतले सोमबार प्रदेश सभा सदस्यलाई प्रदेश सभामा प्रवेश गर्नबाट रोक्ने कार्यक्रम घोषणा गरेकोले स्थानीय प्रशासनले बुटवलमा सोमबार निषेधाज्ञा जारी गरेको छ । सत्तारुढ दलसमेत निर्णयको विरुद्धमा उभिएपछि बुटवलको अवस्था थप तनावग्रस्त भएको छ ।
