सिन्धुलीमा माइक्रो दुर्घटना, पाँच जना घाइते



सिन्धुली कात्तिक १२ ।

सिन्धुलीको गोलञ्जोर गाउँपालिका ५ खनियाँखर्कको चेक पोष्ट अगाडि माइक्रो दुर्घटना हुँदा पाँच जना घाइते भएका छन्।

घाइते हुनेहरूमा ललितपुरको गोदावारी नगरपालिका ५ की सीता सिलवाल, सर्लाहीको नयाँ रोडकी ३० वर्षीया बबिता थापा, उनकी चार वर्षीया छोरी लक्ष्मी थापा र ललितपुरकै इमाडोल नगरपालिका ९ का २८ वर्षीय यामकुमार श्रेष्ठ र उनको बहिनी १८ वर्षीया सबिमा श्रेष्ठ रहेका छन् ।

बा २ ख ३९२३ नम्बरको माइक्रो काठमाडौंदेखि सर्लाहीतर्फ जाँदै थियो। उक्त माइक्रो खनियाँखर्कमा रहेको प्रहरी चेक पोष्ट अगाडि बिपी राजमार्गमा रोकेर इन्ट्री गर्न जाँदा ब्याक सरेर बुधबार दिउँसो दुर्घटना भएको हो।

चालकले माइक्रो रोके पनि गाडी स्टार्टमा राखी हेन्ड ब्रेक पनि नलगाउँदा दुर्घटना भएको जिल्ला प्रहरी कार्यालय सिन्धुलीले जनाएको छ। घाइतेहरूको जिल्ला अस्पताल सिन्धुलीमा उपचार भइरहेको छ।

प्रतिक्रिया दिनुहोस्