प्रधानमन्त्री ओलीलाई साधारण सदस्य समेत नरहने गरी कारबाही गर्ने दाहाल–नेपाल समूहको निर्णय
काठमाडौं माघ ११ ।
प्रधानमन्त्री केपी शर्मा ओलीलाई पार्टीले अनुशासनको कारबाही गरेको छ ।
आइतवार नेपाल कम्युनिष्ट पार्टी नेकपाको केन्द्रीय कार्यालय पेरिसडाँडामा बसेको स्थायी समिति बैठकले ओलीलाई अनुशासनको कारबाही गर्दै पार्टीको साधारण सदस्यता समेत नरहने गरी निश्कासन गरेको हो ।
प्रतिनिधि सभा विघटनलगत्तै विभाजन भएको नेकपाको प्रचण्ड–नेपाल समूहले ओलीलाई यसअघि नै पार्टीको अध्यक्षबाट हटाएको थियो । केही दिन अघि ओलीलाई साधारण सदस्यसमेत नरहने गरी कारबाही किन नगर्ने भनी स्पष्टिकरण सोधिएको र त्यसको जवाफ ओलीले नदिएकाले पार्टीको साधारण सदस्यबाट समेत निश्कासन गरिएको पार्टी प्रवक्ता नारायणकाजी श्रेष्ठले जानकारी दिए ।
स्थायी समितिको बैठकले पार्टीको केन्द्रीय कार्यालय सचिवमा गंगालाल तुलाधरलाई लैजाने निर्णय गरेको प्रवक्ता श्रेष्ठले बताए । श्रेष्ठका अनुसार कार्यालयको उपसचिवमा मोहन गौतमलाई नियुक्त गर्ने निर्णय भएको छ ।
बैठकले ९ गते राजधानीमा भएको विशाल जन प्रदर्शन भव्य रुपमा सम्पन भएको निश्कर्ष निकालेको छ । केन्द्रीय संघर्ष समितिमार्फत भोली नै अर्को चरणको संघर्षका कार्यक्रम सार्वजनिक गर्ने निर्णय भएको पनि प्रवक्ता श्रेष्ठले जानकारी दिए ।
