बिपी राजमार्ग वर्षात्मा जोखिममा, पुनर्निर्माणमा ढिलाइ र चिन्ता
काठमाडौँ, वैशाख १४ । कुनै समय दिगो मानिएको बिपी राजमार्ग अहिले सामान्य वर्षामा पनि अवरुद्ध हुने अवस्थामा पुगेको छ। २०८१ असोजमा रोसी खोलामा आएको बाढीपहिरोपछि सडक कमजोर बन्दै गएको हो।
राजमार्ग अवरुद्ध हुँदा काठमाडौँ–पूर्वी नेपाल यातायात प्रभावित हुँदै आएको छ। रोसी क्षेत्रमा क्रसर उद्योग र ढुङ्गाखानीका कारण खोलाको सतह बढ्दा सानो वर्षामै पानी सडक माथि बग्ने अवस्था सिर्जना भएको छ।
जापान सरकारको अनुदान र नेपाल सरकारको लगानीमा पुनर्निर्माण प्रक्रिया अघि बढे पनि यसको स्थायित्वप्रति विज्ञहरूले चिन्ता व्यक्त गरेका छन्। खानी तथा क्रसर व्यवस्थापन नगरी पुनर्निर्माण गर्नु प्रभावकारी नहुने उनीहरूको भनाइ छ।
विज्ञहरूका अनुसार रोसी खोलाको बहाव व्यवस्थापन, भू–प्राविधिक सुधार र अनियन्त्रित उत्खननमा नियन्त्रण नगरे सडक पुनः जोखिममा पर्नेछ। साथै, अत्यधिक भार भएका सवारी नियन्त्रण र वातावरणीय उपाय अपनाउनुपर्ने सुझाव दिइएको छ।
हाल गेग्रानसहितको भेल सडकबाटै बग्ने समस्या देखिएको छ भने सम्बन्धित निकायले समाधानका उपाय चाँडै अपनाउने जनाएको छ।