बेलिङ्घमको दोहोरो प्रहारमा इंग्ल्यान्ड सेमिफाइनलमा, नर्वेको ऐतिहासिक यात्रा क्वार्टरफाइनलमै टुंगियो
काठमाडौँ,असार २८ । जुड बेलिङ्घमको दुई गोलको प्रेरणादायी प्रदर्शनमा इंग्ल्यान्डले नर्वेलाई अतिरिक्त समयमा २–१ ले पराजित गर्दै फिफा विश्वकप २०२६ को सेमिफाइनलमा स्थान सुरक्षित गरेको छ।
मियामी स्टेडियममा सम्पन्न रोमाञ्चक क्वार्टरफाइनलमा नर्वेले ३६औँ मिनेटमा अग्रता लिएको थियो। कप्तान मार्टिन ओडेगार्डको पासमा आन्द्रेयास शेल्डेरुपले गरेको प्रहार गोलकिपर जोर्डन पिकफोर्डले रोक्न नसक्दा बल पोस्टको माथिल्लो भागमा लागेर जाली चुमेको थियो।
पहिलो हाफको इन्ज्युरी समयमा इंग्ल्यान्डले खेल बराबरीमा ल्यायो। एन्थोनी गोर्डनको आकर्षक पासमा बेलिङ्घमले सहज फिनिस गर्दै टोलीलाई १–१ को अवस्थामा पुर्याए।
दोस्रो हाफमा नर्वेले फेरि अग्रता लिएको जस्तो देखिए पनि टोर्ब्योर्न हेग्गेमको गोल एर्लिङ हालान्डले इलियट एन्डरसनमाथि फाउल गरेको ठहर गर्दै रद्द गरियो। त्यसलगत्तै डेभिड मोलर वोल्फको शक्तिशाली हेडर क्रसबारमा लाग्दा नर्वे बराबरी तोड्ने सुनौलो अवसरबाट वञ्चित बन्यो।
निर्धारित ९० मिनेट १–१ को बराबरीमा सकिएपछि खेल अतिरिक्त समयमा धकेलिएको थियो। अतिरिक्त समय सुरु भएको तीन मिनेटमै इंग्ल्यान्डले निर्णायक गोल गर्यो। वैकल्पिक खेलाडी मोर्गन रोजर्सको प्रहार गोलकिपर ओर्यान निलान्डले नियन्त्रणमा लिन नसक्दा रिबाउन्डमा बेलिङ्घमले दोस्रो गोल गर्दै इंग्ल्यान्डलाई २–१ को अग्रता दिलाए।
बाँकी समयमा नर्वेले बराबरी गोलका लागि लगातार दबाब बनाए पनि इंग्ल्यान्डको सुदृढ रक्षापंक्तिलाई भेद्न सकेन। अन्तिम सिटीसँगै इंग्ल्यान्डले कठिन जित निकाल्दै सेमिफाइनलको यात्रा तय गर्यो।
यो जितसँगै इंग्ल्यान्ड तेस्रो पटक विश्वकपको सेमिफाइनलमा पुगेको छ। सन् १९६६ पछि दोस्रो पटक विश्वकपको फाइनल पुग्ने लक्ष्य बोकेको इंग्ल्यान्ड अब अर्जेन्टिना र स्विट्जरल्यान्डबीचको विजेतासँग सेमिफाइनलमा भिड्नेछ।
दुई गोल गरेका बेलिङ्घम खेलको उत्कृष्ट खेलाडी घोषित भए। विश्वकपमा बेलिङ्घम र ह्यारी केनको समान ६–६ गोल पुगेको छ। एउटै विश्वकप संस्करणमा दुई इंग्लिस खेलाडीले पाँचभन्दा बढी गोल गरेको यो पहिलो अवसर पनि हो।
यस्तै, गोलकिपर जोर्डन पिकफोर्डले विश्वकपमा इंग्ल्यान्डका लागि १८औँ खेल खेल्दै पिटर शिल्टनको कीर्तिमान तोडे। उता, पहिलो पटक विश्वकपको क्वार्टरफाइनल पुगेको नर्वेको ऐतिहासिक यात्रा अन्तिम आठमै टुंगिएको छ। यसअघि नर्वे सन् १९३८ र १९९८ मा अन्तिम १६ सम्म पुगेको थियो भने १९९४ को विश्वकपमा समूह चरणबाटै बाहिरिएको थियो।