रोल्पाको कोटलबारा पहिरोमा मृत्यु हुनेको संख्या ११ पुग्यो
रोल्पा,साउन ३० । रोल्पाको थबाङ गाउँपालिका–५ उवाको कोटलबारामा गएको पहिरोमा परी मृत्यु हुनेको संख्या ११ पुगेको छ। पहिरोमा बेपत्ता स्थानीय लीलबहादुर पुन मगरको शरीरको अंग फेला परेपछि पहिचान भएको हो।
लुङ्ग्री खोलामा फेला परेको खुट्टाको पैताला प्राथमिक स्वास्थ्य केन्द्र सुलिचौरमा राखिएको थियो। उक्त पैताला थबाङ गाउँपालिका–५ कोटलबारा निवासी करिब ६१ वर्षीय लीलबहादुर पुन मगरको भएको उनका छोरा गोबबहादुर पुन मगरले सनाखत गरेका हुन्।
सनाखतपछि परिवारले उक्त अंग बुझेर लगेको इलाका प्रहरी कार्यालय सुलिचौर, रोल्पाले जनाएको छ। लीलबहादुरको पहिचान भएसँगै कोटलबारा पहिरोमा मृत्यु हुनेको संख्या ११ पुगेको हो।
घटनामा अझै दुई जना बेपत्ता छन्। बेपत्ता हुनेमा थबाङ गाउँपालिका–५ कोटलबारा निवासी करिब ९ वर्षीय अशिम पुन मगर र करिब ८० वर्षीय अजम्बर पुन मगर रहेका छन्। उनीहरूको खोजी कार्य जारी रहेको प्रहरीले जनाएको छ।