हाइडेनहाइमलाई ४–२ ले हराउँदै बायर्नको प्रि-सिजन सुखद अन्त्य
एजेन्सी,भदौ ३ । बायर्न म्युनिखले प्रि-सिजनको अन्तिम मैत्रीपूर्ण खेलमा हाइडेनहाइमलाई ४–२ गोलले पराजित गर्दै आगामी सिजनका लागि सुखद तयारी पूरा गरेको छ।
हाइडेनहाइमले खेलमा दुईपटक अग्रता लिए पनि बायर्नले दोस्रो हाफमा उत्कृष्ट पुनरागमन गर्दै जित हात पारेको हो। खेलको पाँचौँ मिनेटमा यानिक वाग्नरले गोल गर्दै हाइडेनहाइमलाई सुरुआती अग्रता दिलाएका थिए।
२५औँ मिनेटमा फेलिपे चाभेजले फ्रिकिकमार्फत गोल गर्दै बायर्नलाई खेलमा फर्काए। तर पहिलो हाफ सकिनुअघि जुलियन निह्युसले कर्नरबाट आएको बलमा भली प्रहार गर्दै हाइडेनहाइमलाई पुनः अग्रता दिलाए।
दोस्रो हाफ सुरु भएको दुई मिनेटमै अरिजोन इब्राहिमोभिचले पेनाल्टीमार्फत गोल गर्दै खेल २–२ को बराबरीमा ल्याए। त्यसपछि बायर्नले लगातार दबाब बढाउँदै खेल आफ्नो नियन्त्रणमा लिएको थियो।
खेल सकिन १२ मिनेट बाँकी हुँदा माइकल ओलिसेको पासमा लुइस डियाजले गोल गर्दै बायर्नलाई पहिलोपटक अग्रता दिलाए। ८३औँ मिनेटमा नाथानिएल ब्राउनले व्यक्तिगत प्रयासमा गोल थपेपछि बायर्न ४–२ ले विजयी भयो।
पहिलो हाफमा हाइडेनहाइमको प्रतिआक्रमणले बायर्नलाई दबाबमा राखेको थियो। घरेलु टोलीले पहिलो हाफमा गरेका ६ प्रहारमध्ये चार प्रहार लक्ष्यमा थिए। तर ह्यारी केन, माइकल ओलिसे र लुइस डियाज मैदान प्रवेश गरेपछि बायर्नको आक्रमण थप प्रभावकारी बनेको थियो।
बायर्नका लागि भने जमाल मुसियालाको चोटले चिन्ता थपिएको छ। आरबी लिपजिङविरुद्धको खेलमा मैदानमै ढलेका मुसियाला यस खेलमा वैकल्पिक खेलाडीका रूपमा मैदान प्रवेश गरेको केही मिनेटमै पुनः बाहिरिएका थिए।
प्रि-सिजनको अन्तिम खेलमा जित हात पारेसँगै बायर्न अब बोरुसिया डर्टमन्डविरुद्ध हुने सुपरकपको तयारीमा केन्द्रित हुनेछ।