३८ ग्राम खैरो हेरोइनसहित मकवानपुरमा तीन जना पक्राउ
मकवानपुर,भदौ २१ — मकवानपुरको हेटौँडा उपमहानगरपालिका–१५, नयाँबस्तीबाट ३८ ग्राम खैरो हेरोइनजस्तो देखिने लागूऔषधसहित तीन जना पक्राउ परेका छन्।
विशेष सूचनाका आधारमा खटिएको प्रहरी टोलीले पूर्व–पश्चिम सडकखण्डअन्तर्गत चुरियामाईतर्फबाट हेटौँडातर्फ आउँदै गरेको बागमती प्रदेश ०३–००३ प ७८१२ नम्बरको मोटरसाइकल रोकी जाँच गर्ने क्रममा उनीहरूलाई पक्राउ गरेको हो।
पक्राउ पर्नेमा हेटौँडा उपमहानगरपालिका–१२ का २४ वर्षीय अभिषेक भ्लोन, मनहरी गाउँपालिका–३ डोढेका २४ वर्षीय आशिष घलान र २७ वर्षीय बिमल सुनार रहेका छन्। भ्लोन मोटरसाइकल चालक हुन् भने घलान र सुनार मोटरसाइकलमा सवार थिए।
प्रहरीका अनुसार खानतलासी गर्दा उनीहरूको साथबाट प्रतिबन्धित लागूऔषध खैरो हेरोइनजस्तो देखिने पदार्थ ३८ ग्राम बरामद भएको छ। पक्राउ परेकाहरूमाथि घटनाबारे थप अनुसन्धान भइरहेको प्रहरीले जनाएको छ।