बाढीपहिरोले अवरुद्ध टेलिकम सेवा शीघ्र सञ्चालन गर्न मन्त्री तिमिल्सिनाको निर्देशन
काठमाडौँ, असोज १४ । सूचना तथा सञ्चारमन्त्री डा. विक्रम तिमिल्सिनाले बाढी तथा पहिरोका कारण अवरुद्ध नेपाल टेलिकमको दूरसञ्चार सेवा शीघ्र पुनःसञ्चालनमा ल्याउन निर्देशन दिनुभएको छ।
मन्त्रालयका सचिव राजेन्द्रप्रसाद पौडेल, नेपाल टेलिकमका प्रबन्ध निर्देशक संगीता पहाडी (अर्याल) लगायत उच्च व्यवस्थापनसँग मंगलबार मन्त्रालयमा भएको छलफलमा मन्त्री तिमिल्सिनाले बाढीपहिरोबाट टेलिकमका टावर तथा साइटमा पुगेको क्षति, अवरुद्ध सेवा र हालसम्मको पुनःस्थापना प्रगतिबारे जानकारी लिनुभएको हो।
प्राकृतिक विपत्तिका कारण सञ्चार सेवा अवरुद्ध हुँदा प्रभावित नागरिकसँगै उद्धार तथा राहतमा खटिएका सुरक्षाकर्मी, सरकारी निकाय र अन्य सरोकारवाला निकायलाई समेत कठिनाइ हुने भएकाले सेवा पुनःस्थापनालाई उच्च प्राथमिकतामा राख्न उहाँले निर्देशन दिनुभयो।
उहाँले प्रभावित क्षेत्रको भौगोलिक अवस्था, सडक तथा विद्युत् संरचनामा भएको क्षति र उपकरण तथा प्राविधिक जनशक्ति परिचालनबारे जानकारी लिँदै तत्काल विद्युत् आपूर्ति पुर्याउन नसकिने स्थानमा वैकल्पिक उपाय अपनाएर भए पनि सेवा सञ्चालनमा ल्याउन निर्देशन दिनुभयो।
छलफलमा नेपाल टेलिकमका प्रमुख सञ्चालन अधिकृत प्रेमप्रसाद सिलवालले बाढीपहिरोबाट विभिन्न साइटमा पुगेको क्षति र सेवा पुनःस्थापनाका लागि भइरहेको कामबारे जानकारी गराउनुभयो। उहाँका अनुसार अधिकांश प्रभावित टावरमा विद्युत् आपूर्ति अवरुद्ध हुँदा टेलिफोन तथा इन्टरनेट सेवा प्रभावित भएको थियो।
विद्युत् आपूर्ति तत्काल पुनःस्थापना गर्न सम्भव नभएका स्थानमा हेलिकप्टरमार्फत जेनेरेटर तथा आवश्यक उपकरण ढुवानी गरी सेवा सञ्चालनमा ल्याउनुपर्ने अवस्था रहेको सिलवालले बताउनुभयो। केही स्थानमा उपकरणसँगै प्राविधिक जनशक्तिसमेत हेलिकप्टरमार्फत लैजानुपर्ने अवस्था रहेको उहाँले जानकारी दिनुभयो।
नेपाल टेलिकमले अवरुद्ध सेवा पुनःसञ्चालनका लागि आवश्यक जनशक्ति तत्काल परिचालन गरी प्रभावित साइटलाई प्राथमिकताका आधारमा सञ्चालनमा ल्याइरहेको जनाएको छ।सडकमार्गबाट पुग्न नसकिने तथा विद्युत् आपूर्ति तत्काल सम्भव नभएका स्थानमा वैकल्पिक व्यवस्था गरी सेवा सञ्चालन गर्ने काम भइरहेको टेलिकमले जनाएको छ।
एक हजार दुई साइट पुनःसञ्चालन
नेपाल टेलिकमका अनुसार असोज ८ देखि ११ गतेसम्म देशका विभिन्न स्थानमा आएको बाढी तथा पहिरोका कारण विद्युत् आपूर्तिसमेत अवरुद्ध हुँदा एक हजार १३२ वटा टेलिफोन टावर प्रभावित भएका थिए। तीमध्ये हालसम्म एक हजार दुई वटा साइट पुनःसञ्चालनमा आइसकेका छन् भने १३० वटा साइट अझै सञ्चालनमा आउन सकेका छैनन्।
सञ्चालनमा आउन बाँकी टावरलाई शीघ्र सञ्चालनमा ल्याउन विद्युत् आपूर्ति, उपकरण, प्राविधिक जनशक्ति तथा ढुवानी व्यवस्थालाई प्रभावकारी रूपमा परिचालन गर्न मन्त्री तिमिल्सिनाले निर्देशन दिनुभएको हो।
टेलिकमका अनुसार हाल म्याग्दीमा २४, रोल्पामा १९, मनाङमा १५, प्युठानमा १५, बागलुङमा १३, पाल्पामा ११, गुल्मीमा नौ, अर्घाखाँचीमा सात, दाङमा छ, मुस्ताङमा चार र पर्वतमा तीनवटा टेलिफोन टावर सञ्चालनमा आउन बाँकी छन्।
त्यस्तै कपिलवस्तु, नवलपरासी, गोरखा, लमजुङ, रुपन्देही र स्याङ्जालगायत जिल्लाका केही टेलिफोन टावर पनि अझै सञ्चालनमा आउन सकेका छैनन्। प्रभावित जिल्लाका बाँकी साइटमा प्राविधिक टोली परिचालन गरी सेवा पुनःसञ्चालनको काम भइरहेको नेपाल टेलिकमले जनाएको छ।