अर्घाखाँचीमा मोटरसाइकल दुर्घटना हुँदा बाबुछोराको मृत्यु
अर्घाखाँची, कात्तिक ५ । अर्घाखाँचीमा मोटरसाइकल दुर्घटना हुँदा बाबुछोराको मृत्यु भएको छ।
भूमिकास्थान नगरपालिका–२ स्थित ढाकावाङ–सन्धिखर्क सडकखण्डमा बिहीबार बिहान भएको दुर्घटनामा बाबु र छोराको घटनास्थलमै मृत्यु भएको प्रहरीले जनाएको छ।
प्रहरीका अनुसार बिहान करिब ८ः१० बजे लु ६४ प ७४७१ नम्बरको मोटरसाइकल अनियन्त्रित भई सडकबाट करिब ५० मिटर तल खसेको थियो।
दुर्घटनामा परी भूमिकास्थान नगरपालिका–८, लम्ची स्थायी घर भई हाल काठमाडौं बस्दै आएका ६२ वर्षीय देविराम आचार्य र उनका २३ वर्षीय छोरा विवेक आचार्यको मृत्यु भएको हो।
घटनाको जानकारी प्राप्त हुनासाथ जिल्ला प्रहरी कार्यालय अर्घाखाँचीबाट प्रहरी नायब उपरीक्षक दिवसबहादुर जिसीको नेतृत्वमा १० जनाको प्रहरी टोली घटनास्थलमा खटिएको थियो।