मालुङ-पञ्चेटारबीचमा पहिरो गएपछि छहरे-टोखा सडक पुनः अवरुद्ध
साझा पथ संवाददाता
काठमाडौं, साउन ९ । पहिरोका कारण छहरे-टोखा सडकखण्ड फेरि अवरुद्ध भएको छ ।
अविरल वर्षाले काठमाडौं सामाखुसीदेखि ५ किलोमिटर क्षेत्रमा पर्ने मालुङ-पञ्चेटार सडकअन्तर्गतको बीचको खण्डमा पहिरो गएसँगै छहरे टोखा सडकखण्ड अवरुद्ध भएको हो । सडकको छेउको भाग भासिएर तल्लो क्षेत्रको फर्ममा समेत क्षति पुगेको छ ।
सडक अवरुद्धसँगै काठमाडौं-नुवाकोट आवातजावतका यातायातका साधन बीच बाटोमै रोकिएका छन् । यद्यपि मोटरसाइकल भने आवातजावत गर्न सकिने टोखा प्रहरीले जनाएको छ।
सडक एक हप्तादेखि चर्किएको र बिहीबार रातिको वर्षाले पूर्णरुपमा बगेको टोखा नगरपालिका वडा नम्बर १ का अध्यक्ष श्रीकृष्ण अधिकारीले बताए ।उनका अनुसार यस विषयमा सडक विभागलाई जानकारी गराइसकिएको छ।
‘हामीले वैकल्पिक बाटो सपना तिर्थ-मालुङको बाटोलाई तत्काल सञ्चालन गर्ने योजना तय गरेका छौं’ अध्यक्ष अधिकारीले भने- ‘ज्यादा उपयोगमा नआएकाले उक्त खण्डसमेत हिलोका कारण कठिनाई हुनसक्छ ।’
नगरपालिका र सडक विभागको सल्लाहमा के गर्ने भन्नेबारे निष्कर्षमा पुग्न सकिने अध्यक्ष अधिकारीले साझापथसँग बताए ।
