कोरोना संक्रमितलाई तारकेश्वर नगरको भत्ता
काठमाडौं ,भदौ २२ । तारकेश्वर नगरपालिकाले सेवा क्षेत्रका कोरोना संक्रमितलाई भत्ता वितरण सुरु गरेको छ।
नगरपालिका प्रमुख रामेश्वर बोहोरा, उपप्रमुख भवानी डोटेल, प्रमुख कार्यकारी अधिकृत शिवप्रसाल लम्साल लगायतको टोलीले सोमबार नगर क्षेत्रका संक्रमितलाई जनही ५ हजारका दरले भत्ता वितरण सुरु गरेको हो।
नगरका प्रमुख लगायतका टोलीले तारकेश्वर नगरपालिका वडा नं १० को शिवनगरस्थित नवलचन्द्र शिवाकोटीको घरमा पुगी परिवारका संक्रमित ५ जना सदस्यलाई पाँच हजार भत्ता , मास्क,स्यानिटाइजरका साथै स्वास्थ्य सामाग्री वितरण गरे ।
सो अवसरमा नगर प्रमुख बोहोराले कोरोना संक्रमणका समयमा उच्च मनोबलसहित रोगसँग लड्न संक्रमितलाई सुझाव दिएका छन्।
नगरमा हालसम्म झण्डै २ सय जनालाई कोरोना संक्रमण पुष्टि भएको छ । संक्रमितमध्ये एकको भने मृत्यु भैसकेको छ।
