नेकपाका अध्यक्षद्वयको प्रतिवेदन सर्वसम्मतले पारित
काठमाडौं, भदौ २७ । नेकपाको स्थायी कमिटिको बैठक सम्पन्न भएको छ । बैठकले अध्यक्ष द्वयले प्रस्तुत गरेको प्रतिवेदन सर्वसम्मतिले पारित गरेको प्रधानमन्त्रीका प्रेस सल्लाहकार सूर्य थापाले बताए ।
पार्टीभित्रको आन्तरिक विवाद चुलिएपछि दुई अध्यक्षले साउन ३० गते ६ सदस्यीय कार्यदल गठन गरेका थिए । कार्यदलले पार्टीको आन्तरिक विवाद सल्टाउने सुझावसहितको विषय तयार गरेर भदौ ६ गते प्रतिवेदन बुझायो । सोही प्रतिवेदनको आधारमा दुई अध्यक्षले प्रस्ताव तयार गरेर शुक्रबारको बैठकमा पेश गर्नु भएपछि त्यसमा केन्द्रित भएर आज छलफल भएको थियो ।
बैठकमा पार्टी अध्यक्ष केपी शर्मा ओलीले सरकारको नेतृत्व गर्दै सरकारमा केन्द्रित रहने र पार्टीका अर्का अध्यक्ष पुष्पकमल दाहालले कार्यकारी अधिकार सहितको अध्यक्षका रुपमा पार्टी अगाडि बढाउने निर्णय गरेको बैठक पछि पार्टी प्रवक्ता नारायणकाजी श्रेष्ठ बताए ।
सरकारले राष्ट्रिय महत्वको निर्णयहरु गर्दा पार्टीको नीति अनुसार गर्ने निर्णय गरेको उनले बताए । साथै पार्टीको महाधिवेशन २०७७ चैत २५ देखि ३० गतेसम्ममा काठमाडौमा आयोजना गर्ने निर्णय गरेको र कार्तिक १५ गतेसम्म केन्द्रिय कमिटीको बैठक आयोजना गर्ने प्रस्ताव पारित गरेको छ।
यो समाचार गोरखापत्र दैनिकले प्रकाशित गरेको छ ।
