कोरोनाका कारण लैङ्गिक हिंसा बढ्यो : राष्ट्र सङ्घ
काठमाडौं मंसिर १६ ।
विश्वव्यापी महामारीका रूपमा फैलिएको कोभिड–१९ सङ्क्रमणका कारण विश्वमा महिलाविरुद्धको लैङ्गिक हिंसा वृद्धि भएको संयुक्त राष्ट्र सङ्घका अधिकारीले बताएका छन् ।
कोभिड–१९ का कारण विश्वका सबै ठाउँमा महिला तथा बालबालिकाविरुद्धको हिंसामा वृद्धि भएको राष्ट्र सङ्घीय लागुऔषध तथा अपराधबारे अनुसन्धान गर्ने राष्ट्र सङ्घीय कार्यालय यूनओडीसीको अध्ययनले देखाएको छ, संस्थाका कार्यकारी निर्देशक घाडा वालाईले बताए ।
महामारी पहिले पनि महिला तथा बालिकाविरुद्ध विभिन्न खालका हिंसा भएको स्मरण गर्दै उनले महामारीपछि यसमा ६० प्रतिशतभन्दा बढीले वृद्धि भएको बताए । कोभिड–१९ महामारीका समय लकडाउन र अन्य उपायहरूका कारण लैङ्गिक हिंसामा प्रचुर मात्रामा प्रभाव परेको यूएनओडीसीले जनाएको छ ।
राष्ट्र सङ्घीय महिला कार्यकारी निर्देशक फुम्जिले एमलाम्बोएनगुकाले सङ्क्रमणमा परि जीवन जोगाउन सफल अधिकांश झन्डै ८० प्रतिशत महिलाले यौन हिंसाको सिकार बन्नुपरेको बताइन् ।सामाजिक तथा आर्थिक अवस्थाका कारण पनि उनीहरूले ती अपराधको सामना गर्नुपरेको तर महामारीको समयमा उनीहरूमा सामाजिक तथा आर्थिक असर अझ जटिल बनेको एमलाम्बोएनगुकाले बताइन् ।
कोभिड–१९ का कारण थप ७० लाख महिला तथा किशोरीहरू जटिल खालको गरिबीतर्फ धकेलिएको र महिला तथा बालबालिका बेचबिखन मौलाएको उनको दाबी थियो । अप्रिलमा संयुक्त राष्ट्र सङ्घका महासचिव एन्टिनियो गुटेर्रेसले विश्वव्यापी घरेलु हिंसा ‘रोक्न’ महिलाको सुरक्षालाई प्राथमिकता दिन आग्रहसमेत गर्नुपरेको थियो ।
अहिलेसम्म झन्डै एक सय ५० राष्ट्रले महासचिव गुटेर्रेसको आग्रहलाई सम्मान गर्दै सङ्क्रमित महिला तथा बालबालिकालाई प्राथमिकतामा राखेको बताइएको छ । यसलाई यूएनओडीसी, राष्ट्र सङ्घीय महिला इकाइ र अन्य सहयोगीले पनि पालना गरेको बताइएको छ ।
